ရှာဖွေရေး ...

Loading...
PO Box 320-207, San Francisco, CA 94132-0207, USA – editors @ moemaka.net ((510) 854-6501)။ HOME, ၅၈/၆၀ ဗိုလ်အောင်ကျော်အောက်လမ်း၊ ရန်ကုန်၊ ဖုံး (၀၉၂၅- ၄၂၀၀ - ၆၀၆)။ စာတိုက်သေတ္တာ (၈၂၅)၊ ရန်ကုန်စာတိုက်ကြီး။

ကာတွန်း ATH - ဟောက်သံထွက်ပေါ် တို့လွှတ်တော်

 
ကာတွန်း ATH - ဟောက်သံထွက်ပေါ် တို့လွှတ်တော်
မေ ၂၈၊ ၂၀၁၅

ကာတွန်း ATH ဖေ့ဘုတ်ခ်မှ ပြန်လည်ကူးယူခြင်းဖြစ်ပါသည်။

ကိုသစ် (သီတဂူ) - ရေသန့်၊ လူသန့်၊ စိတ်မသန့်တသန့်

ကိုသစ် (သီတဂူ) -  ရေသန့်၊ လူသန့်၊ စိတ်မသန့်တသန့်
(မိုးမခ) မေ ၂၈၊ ၂၀၁၅

(တစ်)
လက်ထဲက ရေသန့်ပုလင်းကို ကိုင်နေရင်းက လွန်ခဲ့သောဆယ်နှစ်ကျော်လောက်က အဖြစ်အပျက်ကလေးတခုကို ကြံကြံဖန် ဖန်ပြန် သတိရနေမိသည်။

အဲသည်အချိန်တုန်းက နိုင်ငံခြားကပြန်ရောက်လာသော မိတ်ဆွေတယောက်နှင့် စားသောက်ဆိုင်တဆိုင်မှာ ဆုံဖြစ်ခဲ့ပါ သည်။  “လာခဲ့ဦးဗျာ၊ မတွေ့ရတာ ကြာပြီ၊ စကားလေး ဘာလေး အေးအေး ဆေးဆေး ပြောကြတာပေါ့”ဟုဆိုသောကြောင့် ရန်ကုန်မြို့ထဲက နာမည်ကြီး ထမင်းဆိုင်တဆိုင်တွင် ဆုံဖြစ်ခဲ့ကြပါသည်။ အစားအသောက်တွေကိုလည်း ‘သည်ဟာ ကောင်းတယ်၊ ဟိုဟာက စားလို့မကောင်းဘူး” စသည်ဖြင့် သူကပဲ မှာပေးတာ။ အဲသည်တုန်းက ကျနော်က နိုင်ငံခြားကို တခါမှ မရောက်ဖူးသေးသည့်အချိန်။ ဆိုင်ထဲရောက်ရောက်ချင်း သူက ရေသန့်နှစ်ပုလင်းကို အရင်မှာပါသည်။ ရေသန့်တ ပုလင်းကို ကျနော့်ကို လှမ်းပေးရင်း “သောက်ဗျာ၊ ကျနော်ကတော့ ရေသန့်ပဲသောက်လို့ရတော့တယ်။ မြန်မာပြည်က ရေကိုသောက်ရင် ၀မ်းပျက်တယ်ဗျ’ ဟုပြောချလိုက်တော့ ကျနော်သူ့ကို ပြုံးပြီး စိုက်ကြည့်နေမိသည်။ ဘာစကားမှတော့ ပြန်မပြောဖြစ်ခဲ့။ စိတ်ထဲကတော့ သည်လူ ဘယ်လိုဖြစ်သွားတာပါလိမ့်ပေါ့။

သည်မြေသည်ရေဖြင့် လူလားမြောက်ခဲ့သော သူကို အခုတော့ ဗမာပြည်ကရေက သူ့ကို ၀မ်းပျက်သွားစေပြီတဲ့လား။ ရေ သန့်မှတဲ့လေ။ နည်းနည်းဇီဇာကြောင်သူ၊ အောက်သက်မကျေသူအဖြစ် ကျနော်က သူ့ကို စိတ်ထဲမှာတေးထားလိုက်မိ သည်။ သူဗမာပြည်ကထွက်သွားတာ ဘာကြာသေးတာမှတ်လို့။ ပြီးတော့ သူထွက်သွားတဲ့တိုင်းပြည်က တကယ်တော့ ကျနော်တို့နဲ့ ဘာမှအလှမ်းမဝေးလှတဲ့ အရှေ့တောင်အာရှထဲက တိုင်းပြည်။ နှစ်နှစ်ဆိုသော အချိန်က လူတယောက်ကို သည်လောက်ပဲ အပြောင်းအလဲဖြစ်စေနိုင်သလားလို့ သံသယတော့ ဖြစ်မိသား။ အပြောင်းအလဲက နည်းနည်းများ မြန်နေ သလားလို့ပါ။

သည်လူက လူကဲခတ် မညံ့ဘူးဗျ။ ကျနော့်စိတ်ကို ဖတ်မိပုံရပါသည်။ ‘တကယ်တော့ မြန်မာပြည်ကရေက ထုံးဓာတ်သိပ် များတာဗျ။ ရောက်ခါစဆိုတော့လည်း ဂရုစိုက်ရတာပေါ့။ နောက်ဆိုရင်တော့လည်း အသားကျသွားမှာပါဗျာ’ ဟု ရယ်ကျဲကျဲ ဖြင့် သူက စကားဆိုပါသည်။

သည်တော့မှ ကျနော်ကလည်း ‘အေးဗျာ ကျနော်တို့လူမျိုးတွေရဲ့ ခန္ဓာကိုယ်တွေထဲမှာ ထုံးဓာတ်တွေ ဘယ်လောက်တောင် များနေပြီလဲ မသိတော့ပါဘူး။ ကြာရင် ကျနော်တို့အကုန်လုံး ထုံးခဲကြီးတွေ ဖြစ်ကုန်မှာတောင် စိုးရိမ်ရတယ်ဗျာ’ ဟု အရွှန်းဖောက်ပစ်လိုက်ပါသည်။

ထမင်းစားကြရင်းသူက “ ကျနော်တို့ လူမျိုးတွေသောက်နေတဲ့ရေက ရေသန့် အလွန်နည်းတယ်ဗျ။  ကျနော်တို့ဟာ မသန့်တဲ့ ရေတွေကိုပဲ နေ့တိုင်းသောက်နေရတယ်။ အစားအသောက်တွေဆိုရင်လည်း ကြည့်ပါဦး။ အကုန်လုံးနီးပါးက ဓာတုဆိုးဆေး အမျိုးမျိုးကို သုံးနေကြတယ်။ ရောင်းပန်းလှဖို့ အပင်သန်ဆေးတွေ သုံးတယ်။  အသီးသန်ဆေးတွေ သုံးတယ်။ မျှစ်ရဲ့ မူလ ဘူတအရောင်က အဖြူရောင်လေဗျာ။ အခုကျနော်တို့ ထမင်းဝိုင်းထဲမှာရောက်နေတဲ့ မျှစ်ကလေးတွေက ၀ါဖန့်ဖန့် က လေးတွေ၊ နီကျင်ကျင်ကလေးတွေ ဖြစ်နေတယ်။ အသားတွေကို ကြာရှည်ခံအောင် ရေခဲစိမ်တယ်။ ငါးတွေလည်း သည်အ တိုင်းပဲ မဟုတ်လား။ သည်အတိုင်းသာ ဆက်သွားမယ်ဆိုရင်ဖြင့် ကျနော်တို့လူမျိုးတွေ မကြာခင် ဒုက္ခလှလှ တွေ့ကြရ တော့မယ်’ ဟု ရှည်လျားစွာ ပြောပါသည်။ သူ့စကားနားထောင်ရတာ စားရင်းသောက်ရင်း ကျနော် ကျောချမ်းလာမိသည်။ ကောင်းစေချင်တဲ့စိတ်အခံနဲ့ ပြောနေတဲ့သူ့စေတနာကို ကျနော်လေးစားမိပါသည်။

ကျနော်တို့မှာ ကျန်းမာရေးအသိအားနည်းတာကိုတော့ ၀န်ခံရပါလိမ့်မည်။ ကိုယ့်ခေါင်းပေါ်က ဆံပင်ကိုတောင် အရောင် အမျိုးမျိုးဆိုးနေကြပြီဖြစ်ရာ ဆေးဆိုးပန်းရိုက် သံသရာကြီးထဲမှာ တ၀ဲလည်လည်။ အခုချိန်ထိ ရုန်းမထွက်နိုင်ကြသေး။ တချို့ဆိုရင် အန္တရာယ်ရှိမှန်းတောင် မသိကြတော့။
နောက်တလလောက်ကြာတော့ ရေသန့်ရောဂါရနေသော အခြားမိတ်ဆွေတယောက်နှင့် ဆုံဖြစ်ပြန်ပါသည်။ သူ့လက်ထဲက ရေသန့်ဗူးကလေးကို ထောင်ပြရင်း သူက ‘ကျနော်အခု ရိုးရိုးရေ မသောက်တော့ဘူးဗျ။ ရေသန့်ပဲ မှာသောက်တော့တယ်’ဟု ရိုးရှင်းစွာ ပြောပါသည်။ သူရေသန့်သောက်ခြင်းမှာ ဘာအကြောင်းပြချက်မှမရှိ။ သူနှင့်ကျနော်က အသက်ချင်းကလည်း သိပ်မကွာ၊ ဘော်ဒါရင်းတွေလည်းဖြစ်နေလို့ စိတ်ပေါက်ပေါက်နှင့် ကျနော်ပြောချပစ်လိုက်ပါသည်။ ရေသန့်သောက်တိုင်း လည်း လူသန့်ဖြစ်တာမဟုတ်ပါဘူးဗျာ...။
                      
(နှစ်)
ပုပ္ပါးအကွာဆိုသော သောက်ရေသန့်က တီဗီဖန်သားပြင်ပေါ်မှာ နေ့စဉ်လိုလို ကြော်ငြာနေသည့် အချိန်။ အဲသည်အချိန်တုန်းက ရေသန့်ရောဂါထနေသူများကို ကျနော် တော်တော်အမြင်ကတ်ပါသည်။ နောက်ပိုင်း ကိုယ်တိုင်အပြင်ထွက်ကြည့်မိတော့မှ ကျနော့်မိတ်ဆွေတွေပြောတာ မလွန်ပါလားဟု သဘောပေါက်သွားသည်။

ဘရာဇီးဘောလုံးသမားတွေ အရှေ့တောင်အာရှဘက်ဆီ ချစ်ကြည်ရေးပွဲတွေလာကစားကြတုန်းက ဘရာဇီးနိုင်ငံက သောက်ရေသန့်တွေ ယူလာခဲ့ကြပါသတဲ့။ ဘရာဇီးအစားအစာကိုလည်း လေယာဉ်နဲ့မှာယူပေးရပါသတဲ့။ ဥရောပဘောလုံး ကလပ်တွေ လာတုန်းကလည်း ထိုနည်းလည်းကောင်း။ ဥရောပသောက်ရေသန့်၊ ဥရောပ အစားအစာ။ သည်တခါတော့ သူတို့ကို သိပ်က်ိန်းခမ်းကြီးတာပဲ ဟု ကျနော် မပြောရဲတော့။ ဘာပဲဖြစ်ဖြစ် သူတို့က ကျနော်တို့ထက် ကျန်းမာရေး ဗဟုသုတ ကြွယ်ဝကြသူတွေ မဟုတ်လား။

ကျနော်တို့ ပြည်မက လူတွေတောင် တောင်ကြီးလို၊ ပူတာအိုလို တောင်တန်းဒေသတွေဆီ အလည် အပတ်သွားကြသည့်အခါ ရေပြောင်းမြေပြောင်းဒဏ်ကို ခံကြရသေးသည်ဖြစ်ရာ အနှီဥရောပသားတွေ၊ အမေရိကသားတွေကို အပြစ်မမြင်ရက်တော့။ ယခုအခါ ရေသန့်ဗူးအမျိုးမျိုးကို နေရာဒေသတော်တော်များများမှာ တွေ့မြင်နေကြရပြီဖြစ်ရာ ကျနော်တို့လူမျိုးတွေ ကျန်းမာ ရေးအသိ ကြွယ်ဝလာကြပြီဟုတွေးပြီး ၀မ်းသာမဆုံးဖြစ်မိပါသည်။ ပေါလိုက်သည့် ရေသန့်ဗူးတွေ။ အရွယ်အစား အမျိုးမျိုး၊ တံဆိပ်အဖုံဖုံ။ ကျနော့်မိတ်ဆွေတချို့ပင် ရေသန့်ဗူးထုတ်လာကြသည်ကို တွေ့ရပါသည်။ ကျနော့်အမေ တောသူမကြီး ကိုယ်တိုင်ပင် ‘သား အမေကတော့ နည်းနည်းဖျားချင် နာချင်သလိုဖြစ်လာတဲ့အခါ ရေသန့်ဗူးဝယ်သောက်လိုက်တာပဲ။ နှစ်ဗူးလောက်ကုန်ရင် ပျောက်ပြီ’ဟု ပြောခဲ့ဘူးပါသည်။ သြော်.. ရေသန့်ဆိုသည်မှာ ဆေးတမျိုးပဲမဟုတ်ပါလား။

လွန်ခဲ့သောတပတ်လောက်က  သောက်သုံးရန်မသင့်သော ရေသန့် ၁၉ မျိုးကို နာမည်နှင့်တကွ စာရင်းပြုစုပြီး ထုတ်ဖော် ကြေငြာလိုက်သသောအခါ ကျနော်လန့်ဖြတ်သွားပါသည်။ ထိုစာရင်းပါသော ဂျာနယ်ကြီးကို လက်ကကိုင်းရင်း အမေ့ အိပ်ရာဘေးမှာ ထောင်ထားသော ရေသန့်ဗူးကလေးနှင့် ကျနော့်လက်ထဲမှာရှိနေသော ရေသန့်ဗူးကလေးကို ငုံ့ကြည့်ပြီး ကျနော်တို့ ရယ်ပွဲဖွဲ့ခဲ့မိပါတော့သည်။ ကျနော်တို့ ပြည်သူတွေက ရေသန့်ဟု ယုံကြည်၍ ပိုက်ဆံပေးပြီးသောက်ခဲ့သော ရေသန့်တွေက အခုတော့ ရေသန့်အစစ်မဟုတ်ဘူးတဲ့။ သောက်သုံးရန် မသင့်တော့ဘူးတဲ့ဗျာ။ ရေသန့်တွေခေတ်စား လာသောအခါ မှန်မှန်ကန်ကန် အဆင့်မီမီ ထုတ်လုပ်ကြသူတွေရှိသလို မရိုးမသား အကြံအဖန်ထုကြသူတွေလည်း ရှိပါ သည်။

အစားအစာတွေက မသန့်၊ နေ့စဉ်သောက်သုံးနေရတဲ့ သောက်ရေတွေက မသန့်နဲ့ပြည်သူတွေရဲ့ဘ၀က နေရထိုင်ရ စားရ သောက်ရတာ ကျောချမ်းစရာကြီးပါလား။
                  
(သုံး)
ပူပြင်းချောက်သွေ့သော နွေရာသီကိုရောက်ပြီဆိုမှဖြင့် ပြည်သူတွေ မရှိမဖြစ်လိုအပ်သော အရာကတော့ ရေပဲဖြစ်ပါသည်။ လျှပ်စစ်မီးမရှိလည်း သိပ်ကိစ္စမရှိ။ ကျနော်တို့က မှောင်နဲ့ မည်းမည်းထဲမှာ နေသားကျပြီးသား။ တီဗွီမရှိလည်း ကိစ္စမရှိ၊ အဲယားကွန်းမရှိလည်း ပြဿနာမဟုတ်။ မော်တော်ကားမရှိ၊ ကွန်ပျူတာမရှိလည်း နေပါစေ။ ကိစ္စမရှိ။ သည်အရာတွေက ကျနော်တို့အတွက် မရှိမဖြစ်လိုအပ်နေသော အရာများမဟုတ်ဟု ကျနော်တို့ မှတ်ယူထားပါသည်။ သို့သော် ရေက တော့ဖြင့် ကိစ္စရှိပါသည်။ ပြဿနာရှိပါသည်။

ပရဟိတမင်းသားကြီး ကိုကျော်သူက လက်ဆောင်နှင်းလို့ ကျနော့်ဆီမှာ မဂ္ဂဇင်းတစောင်ရှိပါသည်။ သူရေးထားသည့် ရွှေကို မလို ရေကိုသာလိုသည်ဆိုသော ဆောင်းပါးကလေးကိုဖတ်ပြီး လန့်သွားမိသည်။ ဆောင်းပါးက အညာဒေသမှာ ဘယ်လိုရေ ခက်ခဲသည့်အကြောင်း သူကိုယ်တိုင်ရောက်ခဲ့ မြင်ခဲ့တာကို ဦးကျော်သူကြီးက ရေးခြစ်ထားခြင်းဖြစ်သည်။ ကျနော်တို့ လူမျိုး က တွင်းထဲကထွက်သည့်ရေကိုတောင် ဖောဖောသီသီ မသုံးနိုင်ကြတော့လောက်အောင် ဆင်းရဲကြကုန်ပြီတဲ့လား။ ကျနော် တို့ ခေတ်မီပစ္စည်းအသုံးအဆောင်တွေ အဆင့်မြင့်မြင့် မသုံးနိုင်ကြတာ၊ အိမ်ကောင်း ယာကောင်း တိုက်ကြီးတာကြီးတွေနှင့် ခမ်းခမ်းနားနား မနေနိုင်ကြတာကိုတော့ဖြင့် သည်လောက်ကြီး ၀မ်းမနည်း။ သို့သော် ရေလောက်ကိုတော့ဖြင့် သိပ်အလျှံပယ် ကြီးမဟုတ်ဘူးဆိုရင်တောင် လုံလုံ လောက်လောက် မသုံးနိုင်တာကိုတော့ဖြင့် ကျနော် ၀မ်းနည်း၍ မဆုံးပါလေတော့။

ကျနော်တို့က ရေကိုတောင် ပေါပေါသီသီမသုံးနိုင်ကြတော့ဘူးတဲ့ဗျာ။ ရေရှားပါးလှသော အညာဒေသများဆီသို့ ကျနော် ရောက်ခဲ့ဘူးသည်မှာ အခေါက်ခေါက်အခါခါ။ အုတ်စီရေတွင်းကလေးတွေ လှူခဲ့ဘူးပါသည်။ လက်နှိပ်ဘုံဘိုင်တွင်းကလေးတွေလည်း လှူခဲ့ဘူးပါသည်။ ကျနော်တို့ဒေသသည် မြို့နှင့်လေးမိုင်ခန့်သာဝေးရာ နွေရာသီဆိုလျှင် ရေပြတ်တတ်ပါသည်။ ခပ်လှမ်းလှမ်းမှာ စမ်းတွင်းကလေးတွေရှိ၍ တော်ပါသေးသည်။ အညာဒေသကား ကျနော်တို့ထက် အဆပေါင်းများစွာ အခြေ အနေဆိုးပါသည်။ တအိအိမောင်းနှင်နေကြသော ရေစည်လှည်းကြီးများကို မြင်ရသည်မှာ စိတ်မောရပါသည်။ ရေစည်တလှည်းရဖို့ အချိန်အများကြီးစောင့်ရသည်။ ကိုင်းတပ်ရေမှုတ်ခွက်ကလေးများဖြင့် တကြိုက်စာလောက်သာပါသော ရေကလေးများကို စစ်စစ်ပြီး ရေအိုးကလေးတွေထဲကို ခပ်ထည့် နေကြသောမြင်ကွင်းကို မြင်ရတော့ ရေသောက်ချင်စိတ်ပင် မရှိပါလေတော့။

သည်လိုရေရှားပါးလှသော အညာဒေသများမှာ ဂျပန်နိုင်ငံက လာတူးပေးထားသော စက်ရေတွင်းများစွာရှိသည့်တိုင် ရေက တော့ လိုအပ်နေဆဲပင်ဖြစ်သည်။ ဂျပန်လူမျိုးတွေက ကျနော်တို့ ရေငတ်ရေပြတ်နေတာကို ကရုဏာသက်မိပုံရပါသည်။ ကျနော်တို့ကို သနားလို့နဲ့ တူပါရဲ့။ ပြည်တွင်းပြည်ပက တတ်နိုင်သူတွေက တတ်နိုင်သရွေ့ ကူညီနေကြပေမယ့်လည်း နွေရာသီရောက်ပြီဆိုလျှင်ဖြင့် ရေကတော့ ရှာပါးနေဆဲပင်ဖြစ်သည်။ ရန်ကုန်မြို့ ဟိုနေရာသည်နေရာတွေမှာ ရေပိုက်တွေ ပေါက်ပြီး ရေတွေလျှံထွက်နေတာကို မြင်ရလေတိုင်း အညာဒေသက ကိုင်းတပ် အုတ်မှုတ်ခွက်ကလေးများနှင့် ရေအိုးကလေး များကို အလိုလို သတိရနေမိပါတော့သည်။  ကျနော်တို့ လူကြီးတွေက ကျနော်တို့ကို ရေတောင် ၀လင်အောင် မတိုက်ချင်ကြ တော့ဘူးတဲ့လား။ အခြေခံ သောက်သုံးရေကို ခေါင်းကြီးကြီးထဲထည့်ထားရတာ ပင်ပမ်းလိုက်တာ။ သည်လိုလုပ်ရအောင်ဗျာ ။ ဧရာဝတီမြစ်ကြီးကို ရေရှားတဲ့ အရပ်ဒေသတွေဆီကို ကျနော်တို့အားလုံး ၀ိုင်းပြီး မ,ရွေ့ကြရအောင်။ ခင်များလည်း ပါ။ ကျနော်လည်း ပါ။ အားလုံးပါဝင်ကြပေါ့။
                  
(လေး)
ကျနော်တို့ရဲ့ တန်ဖိုးရှိလှပါတယ်ဆိုတဲ့အချိန်တွေက ရေအလာကို စောင့်စားရင်း ကုန်လွန်နေကြရတာ နှမြောစရာကောင်းပါ သည်။ ဘတ်စ်ကားစောင့်ရင်း ကုန်ဆုံးသွားတဲ့အချိန်တွေ၊ ရထားစောင့်ရင်း ကုန်ဆုံးသွားတဲ့အချိန်တွေ၊ ရုံးမှာ အရာရှိ လက်မှတ်ကလေးရဖို့ ထိုင်စောင့်ရင်း ကုန်ဆုံးသွားခဲ့ရတဲ့ အချိန်တွေ၊ ဆေးရုံဆေးခန်းတွေမှာ ဆရာဝန်အလာကို စောင့်ရင်း ကုန်ဆုံးသွားခဲ့ရတဲ့အချိန်တွေ။ နိုင်ငံအသီးသီးတွင် သည်လိုထိုင်စောင့်ရတာ ရှိနိုင်ပါသည်။ သို့သော် ကျနော်တို့အနေနဲ့ မကုန်သင့်ဘဲ ကုန်ဆုံးနေကြရသည့်အချိန်တွေက နည်းနည်းများလွန်းနေသည်ဟု ကျနော်ထင်ပါသည်။

ကမ္ဘာကြီးမှာ မတ်လ ၂၂-ရက်နေ့ကို ကမ္ဘာ့ရေဇလာနေ့အဖြစ်သတ်မှတ်ပြီး သည်နေ့မှာ ရေကို ချွေတာသည့်အနေဖြင့် ရေပိုက်ခေါင်းတွေကို ခေတ္တခဏပိတ်ထားကြဖို့ ဆော်သြော်နေကြသူတွေ ရှိပါသည်။ ကမ္ဘာပေါ်မှာ သောက်သုံးရေအလုံအလောက်မရကြသည့်ပြည်သူတွေ သန်းနှင့်ချီပြီး ရှိပါသည်ဟု စောဒကတက်လျှင်ဖြင့် ကျနော်ကျေကျေနပ်နပ်ကြီး လက်ခံပါ သည်။ သို့သော် သူတို့နှင့်ကျနော်တို့က အခြေအနေချင်း မတူဘူးလေဗျာ။

ကျနော်၏ အမြင်ကတော့ဖြင့် ကြီးကြီးမားမား ပြဿနာမို့ ကျနော်တို့ပြည်သူတွေ ခေါင်းစားရသည်၊ အချိန်ပေးရသည်ဟု ဆိုလျှင်ဖြင့် ခေါင်းစားရတာ၊ အချိန်ကုန်ရတာ တန်ပါသည်။ သို့သော် အခြေခံ သောက်သုံးရေလောက်ကိုတော့ဖြင့် ခေါင်း လည်းမစားချင်ပါတော့။ ငုတ်တုတ်လည်း ထိုင်မစောင့်ချင်ပါတော့။ သြော်... ရေသန့်၊ လူသန့်၊ စိတ်မသန့်တသန့်နဲ့ ဖြတ်သန်း နေရဦးမည့် ကျနော်တို့ရဲ့ မနက်ဖြန်တွေ.....။

ကိုသစ် (သီတဂူ)

ကာတွန်း ဇာနည်ဇော်ဝင်း - လိုချင်သေးလို့


ကာတွန်း ဇာနည်ဇော်ဝင်း - လိုချင်သေးလို့
(မိုးမခ) မေ ၂၈၊ ၂၀၁၅

ရန်လင်းအောင် - နာရေး

 
ရန်လင်းအောင် -  နာရေး
(မိုးမခ) မေ ၂၈၊ ၂၀၁၅

ငါ့အဖွား
မှာစရာတွေ အများကြီးနဲ့
ငြိမ်သက်သွားပြီ။

ငါ့အဖွား
ပြောစရာတွေ အများကြီးနဲ့
တိတ်ဆိတ်သွားပါပြီ။

ငါ့ကို အမြဲလက်ယပ်ခေါ်တတ်သူ
ငါ့ကို သူ့လက်ပေါ်မှာပဲ ကြီးပြင်းစေခဲ့သူ
ငါ့ကို သူ့လက်ထဲ နွေးထွေးစေခဲ့သူ
အခု
ငါ့ကို လက်ပြနှုတ်ဆက်သွားပါပြီ။

ငါ့ငယ်ဘဝရဲ့  အလင်းဖွဲ့ကမ်းခြေ
ငါ့ငယ်ဘဝရဲ့  အာဟာရဗေဒ
ငါ့ ငယ်ဘဝရဲ့ပုံပြင်စာအုပ်
ငါ့ငယ်ဘဝရဲ့ သမိုင်းဖတ်စာ
အင်္ဂလိပ်ခေတ် ဂျပန့်ခေတ်
ကရင့်ခေတ် ကွန်မြူနစ်ခေတ်
စသဖြင့်  တောပြေး မြို့ပြန်
မြို့ပြေး တောပြန် နေ့စွဲများ
ဗုံခိုကျင်းများ တိုက်လေယာဉ်များ
လက်နက်ကြီးသံများ တောကြောင် လက်ခမောင်းခတ်သံများ
နိုင်ငံရေးဘဝအရှုပ်အထွေးများ
ရောင်စုံသူပုန်များ
အသံမစဲ သဗ္ဗုဒ္ဓေညများ
အဖွားပြောသလောက်
အရုပ်သေနတ်နဲ့တောင် ငါမဆော့ဖြစ်တော့ ……

ဒီလိုလို နဲ့  မဆလ ကုလားဖန်ထိုးလာ
ဟိုလိုလိုနဲ့ နဝတ ဂွင်ချဲ့လာ
တစ တစ အဖွားလည်း အိုမင်းရင့်ရော်လာ
ငါမြင်သလောက် သူ မတွေ့ရတော့
ငါကြားသလောက် သူကိုမပြောဖြစ်တော့
သူ နည်းနည်း စိတ်ချမ်းသာပုံရခဲ့တယ်
အိမ်တွင်းပုန်းနေ့စဉ် သူကြည့်နေကျ
တီဗွီအစီအစဉ် တွေအရပေါ့။

အခု စစ်တပိုင်းအစိုးရ
အဖွား အိပ်ရာဖျာကပ်တယ်
၃၂ ကောဋ္ဌာသလုံး မှုန်ဝါးရပါပြီ
ကံကောင်းသလိုလိုရှိသွားတဲ့
ပြည်သူထဲက ပြည်သူတယောက်
သေချင်စိတ်တဝက်နဲ့
နေဖို့ ခြစ်ခြုပ်အားယူ
အသက်ကလေးရှည်ရှည် တပေပေ
မိဘပြည်သူတယောက်
အမည်ခံဘဝထက်ကောင်းရာသုဂတိ
သူတွေ့ရမှာ ငါယုံတယ်
 

၂၄ မေ ၊ ၂၀၁၅

အဖွား ……………
ဒေါ်ထွေး  (၉၉) နှစ်
သူပြောတဲ့ သမိုင်းမီးပုံကြီးထဲ
သူ့စကားသံ အခုရပ်စဲပြီ
ငါ … ၃၈ နှစ်
လောင်ရင်းကျွမ်းရင်း
ကျန်ခဲ့ပြီ ။   ။
              

ရန်လင်းအောင်

စံပယ်ဖြူ - ရှေ့ဆောင်ကောင်းသော အမေ

စံပယ်ဖြူ - ရှေ့ဆောင်ကောင်းသော အမေ
(မိုးမခ) မေ ၂၈၊ ၂၀၁၅

မရိုးနိုင်တဲ့ အမေ့အကြောင်းကို အရင်က ရေးဖူးပေမဲ့ ထပ်ရေးချင်ပါတယ်။ လူတိုင်းအတွက် အမေဆိုတာ မိုးကောင်းကင်လို၊ မြင့်မိုရ်တောင်လို အံ့မခန်း ကြီးမြတ်သူတွေ ဖြစ်ပါတယ်။ မိခင်အရင်းအခြာမဟုတ်သော်လည်း မိခင်နှင့်တူသော အမေများကို  ရံဖန်ရံခါ ကြုံရတွေ့ရတတ်ပါတယ်။ မိခင်တယောက်လို ကြင်နာညှာတာ တတ်သော ဆရာမများ၊ အလုပ်ရှင် အမျိုးသမီးများကို အမေလို (motherly) ချစ်ခင်တတ်သူလို့ တင်စားတတ်ကြပါတယ်။ ဒီအကြောင်းကိုစဉ်းစားမိရင်း ရှေ့ဆောင်လမ်းပြ ကောင်းသော ကျွန်မရဲ့မွေးမိခင်အကြောင်းနဲ့ မြန်မာပြည်ရဲ့ ဂန္ဓ၀င်မိခင်အကြာင်း ဆက်စပ်စဉ်းစားမိတာတွေကို ၀ါသနာအရ စာတပုဒ် ချရေးလိုက်ပါတယ်။

ကျွန်မတို့အမေက တောရွာက သာမန်အိမ်ရှင်မတယောက်ဖြစ်ပေမဲ့ သားသမီးတွေကို ဆုံးမထိန်းကွပ်တဲ့နေရာမှာ ပညာ တတ်မိန်းမတွေထက် မညံ့ခဲ့တာကို ကျွန်မအမြဲ ဂုဏ်ယူမိပါတယ်။ အမေက ရှေးဆန်သော အဖွားရဲ့အုပ်ထိန်းမှုအောက်မှာ ကြီးပြင်းခဲ့တာမို့ အတွေးအခေါ်က ရှေးဆန်တယ်။ ဘီးစပတ်နဲ့ လည်ပင်းအလုံးကွပ် ရင်ဖုံးအင်္ကျီအမြဲဝတ်တဲ့ ကျွန်မတို့ အမေက ခေတ်မမှီဘူးလို့တော့ ဆိုနိုင်ပါတယ်။ အမေ့ရဲ့လွှမ်းမိုးမှုကြောင့် ထင်ပါတယ်။ ကျွန်မလည်း တခါတလေ အဘွားကြီး ဆန်ဆန် တွေးတတ်ပါတယ်။ သိမ်းထုတ်သေချာဆိုတဲ့စကားအတိုင်း ပစ္စည်းကို စနစ်တကျကိုင်တွယ် သိမ်းဆည်းတတ်တဲ့ အမေ့ရဲ့အကျင့်ကို ငယ်ငယ်က မသိစိတ်ထဲကနေ သင်ယူခဲ့မိတာကို ကြီးလာမှ သတိထားမိပါတယ်။ ကိုယ်အားကိုယ်ကိုး စိတ်ရှိအောင် လေ့ကျင့်ပေးခဲ့တာတွေ၊ မချမ်းသာပေမဲ့ ပေးကမ်း ရက်ရောတတ်အောင် ရှေ့ဆောင်လမ်းပြခဲ့တာတွေကို ပြန် တွေးမိတိုင်း အမေ့ကို လွမ်းမိပါတယ်။

ကျွန်မငယ်ငယ်က သိပ်ပြီးလိမ္မာရိုကျိုးတဲ့ ကလေးတယောက် မဟုတ်ခဲ့ဘူး။ နဲနဲစွာချင်တယ်။ ခိုင်းရင် မလုပ်ချင်ဘူး။ ကျောင်း စာကလွဲရင် ကျန်တာတွေလုပ်ဖို့ သိပ်ပျင်းပါတယ်။ ဒါပေမဲ့ အမေ့ကိုတော့ ကြောက်ရပါတယ်။ သားသမီးတွေကို အလိုမလိုက် တဲ့အမေ့ကို ကြီးလာမှ ကျေးဇူးတင်ရမှန်းသိလာပါတယ်။ နွေရာသီကျောင်းပိတ်ရက်တခုမှာ ကျွန်မ နေကုန်နေခန်း ထမင်းပြန် မစားပဲ သူများအိမ်မှာ သွားနေပြီးဆော့ကစားမိလို့ ကောင်းကောင်း အရိုက်ခံရပါတယ်။ ကျွန်မ ငယ်ငယ်ကတည်းက အမှတ် သညာကောင်းရှိခဲ့တယ်လို့ ဆိုရပါမယ်။ အရိုက်ခံရပြီးတဲ့ နောက်ပိုင်း ကျွန်မ ကစားချိန်တန်ကစားပြီး၊ ပြန်ချိန်တန်ရင် အိမ်ကို ပြန်ပါတယ်။

ကျွန်မ သစ်ပင်ပေါ်တက်လို့ အရိုက်ခံရတာ လည်းရှိသေးတယ်။ ရွာမှာ နွေရာသီဆို သစ်ပင်တွေခုတ်လှဲပြီး ထင်းခွဲကြပါတယ်။ ခုချန်ထိ ကျွန်မတို့ရွာမှာ ထင်းမီးနဲ့ ထမင်းချက်တုန်းပါ။ ကိုယ်ပိုင်သစ်ပင် မရှိတဲ့သူတွေက ထင်းချောက်ကိုင်းတွေ လိုက်စုကြ ပါတယ်။ တချို့က အပင်ပေါ်ကပြုတ်ကျတဲ့ သစ်ကိုင်းချောက်တွေကို လိုက်ကောက်ပြီး စုပါတယ်။ အချို့က အပင်ပေါ်တက် ပြီး၊ သစ်ကိုင်းချောက်တွေကို ချိုးယူကြပါတယ်။ အတုမြင် အတတ်သင်လို့ ဆိုရမလား။ ကျွန်မ ဘယ်က ဘယ်လိုစိတ်ကူး ရမှန်းမသိ အိမ်ရှေ့က မန်ကျည်းပင်ပေါ်တက်ပြီး၊ မန်ကျည်းကိုင်း အချောက်တွေ ချွေချ၊ ထင်းချောင်းတွေ စုမိပါတယ်။ ဒါကို အမေက ချက်ချင်းမြင်ပါတယ်။ အပင်ပေါ်က ပြန်ဆင်းလာဖို့ အမေက အေးအေးဆေးဆေးပဲခေါ်ပါတယ်။ တုတ်ကိုင်ပြီးခေါ် ရင် ကြောက်အားလန့်အားနဲ့ အပင်ပေါ်က ပြုတ်ကျမှာစိုးလို့ပါ။ အပင်အောက်ကို ရောက်တော့ အရိုက်ခံရပါတယ်။ အဲဒီ နောက်ပိုင်း ခုချိန်ထိ ကျွန်မသစ်ပင်ပေါ် မတက်တော့ဘူး။

ရွာက ကျွန်မတို့အိမ်ရှေ့မှာ မျှော့ပေါတဲ့ ချောင်းဦးတိုလေးရှိပါတယ်။ မျှော့ဆိုတဲ့သတ္တ၀ါက အမျိုးသမီးလမ်းကြောင်းထဲကို ၀င်သွားရင် ပြန်မထွက်လာတော့ဘူး၊ လူကိုယ်ထဲမှာ သွေးစုပ်ပြီး မျိုးပွားတယ်လို့ ဆိုပါတယ်။ ဒါကြောင့်မို့ အမေက ကျွန်မကို ချောင်းထဲဆင်းပြီး ရေမကူးဖို့ တားမြစ်ပါတယ်။ ကျွန်မ မျှော့ကို သိပ်ကြောက်ပါတယ်၊ အမေ့ရိုက်မှာကိုလည်း ကြောက်ပါတယ်။ ဒါပေမဲ့ အမေလစ်ရင် ကျွန်မ ရေဆင်းကူးပါတယ်။ ရေမြင်ရင် ကူးချင်တယ်၊ တောင်ကိုမြင်ရင် တက်ချင်တယ်။ သဘာဝ တရားကိုမြတ်နိုးတဲ့ ကျွန်မရဲ့ပင်ကိုယ်ဗီဇကို ကြောက်ခြင်းဆိုတဲ့အရာက မတားဆီးနိုင်တာကို ပြန်တွေးကြည့်မိတိုင်း ကိုယ့် ဘာသာ သဘောကျမိပါတယ်။ အမေကတော့ သူပြင်လို့မရတဲ့ ကျွန်မရဲ့ ဗီဇအချို့ကို လက်လျှော့ ထားရပါတယ်။

လောကကို အကောင်းမြင် ကြည့်မယ်ဆိုရင်တော့ ကျေးလက်တောရွာမှာ ကြီးပြင်းခဲ့ပြီး၊ သာမန်တောင်သူလယ်သမား သား သမီးဖြစ်ခဲ့ရတာ ဘ၀အကြောင်း လက်တွေ့သိခွင့်ရတယ်လို့ ဆိုရပါမယ်။ အထူးသဖြင့် ပင်းပန်းဆင်းရဲဒဏ်ကို ကြံ့ကြံ့ခံ နိုင်ခဲ့ကြတဲ့ အဖေနဲ့ အမေရဲ့ သားသမီးဖြစ်ရတာ တသက်စာ ဘ၀သင်ခန်းစာတွေ ရပါတယ်။ အဖေနဲ့ အမေကြောင့် ကျွန်မ တို့ မောင်နှမတွေ မချမ်းသာသော်လည်း ကိုယ့်အားကိုယ်ကိုး ရပ်တည်နိုင်ကြပါတယ်။ အမေက ကျွန်မတို့မိသားစု တခုလုံးကို လွှမ်းမိုးချုပ်ကိုင် ခဲ့သူပါ။ ငယ်ငယ်က ကျွန်မ သတိမထားမိတဲ့ အမေ့ရဲ့ အရည်အချင်းတွေကို အမေမရှိတော့တဲ့ နောက်ပိုင်းမှ တန်ဖိုးသိခဲ့ပါတယ်။ အမေ့အရိပ်၊ အမေ့ရဲ့အမူအကျင့်တွေက ကျွန်မဘ၀တခုလုံးကို လွမ်းမိုးထားပါတယ်။ ကျွန်မ အဖေ့လို အားနာတတ်ပေမဲ့၊ မတရားဘူးထင်ရင် တုန့်ပြန်ချင်တဲ့ အမေ့လိုစိတ်ဓာတ်က ပိုအားသန်ပါတယ်။

မိဘတွေ စီးပွားရေးမပြေလည်တဲ့ကြားက ပညာသင်ခဲ့ရလို့ ပညာတတ် အသိုင်းအ၀ိုင်းနဲ့ ထိတွေ့ခွင့်ရခဲ့တယ်။ အဖေနဲ့ အမေ မရှိတော့တဲ့နောက်ပိုင်း ကျွန်မဘ၀ကို ကိုယ်တိုင်ပဲ့ကိုင်ပြီး၊ မယိုင်လဲအောင် ထိန်းကျောင်းတတ်ခဲ့ပါတယ်။ မိတ်ဆွေ သူငယ် ချင်းကောင်းတွေ၊ မိခင်လိုချစ်ခင်တတ်သူတွေနဲ့ တွေကြုံခဲ့ရလို့ ဘ၀ခရီးအကွေ့အကောက်တွေကို ကျော်လွန်ဖြတ်သန်းနိုင်ခဲ့ ပါတယ်။ စာဖတ်ခြင်းကို ၀ါသနာပါခဲ့လို့ လောကစာပေ ဓမ္မစာပေတွေကို လက်လှမ်းမှီသလောက် ဖတ်ရှုလေ့လာဖြစ်ခဲ့တယ်။ လူ့သက်တမ်း တ၀က်လောက်ကို ဖြတ်သန်းပြီးခဲ့ပြီမို့ လောကသဘာဝ၊ ဓမ္မနဲ့အဓမ္မတွေကို ကွဲကွဲပြားပြား မြင်တတ်ပါတယ်။ လူ့ပတ်ဝန်းကျင်အပေါ် အမှုမဲ့အမှတ်မဲ့ မနေတတ်တဲ့ ကျွန်မ လူ့အဖွဲ့အစည်းမှာ လွဲချော်နေတဲ့အရာတွေကို အများနည်းတူမြင် ပါတယ်။

ကဗျာဆရာတွေက လောကကြီး လွဲချော်တိမ်းစောင်းနေတာတွေကို ကဗျာနဲ့ ပြန်တည့်မတ်နိုင်အောင် ကြိုးစားကြတယ်။ အမှန်တရား မြတ်နိုးတဲ့ စာရေးဆရာတွေက စာတွေရေးပြီး အမှန်တရားကို မြင်အောင်ပြတယ်။ ၀ါဒဖြန့်ချီရေးသမားတွေက ၀ါဒမှိုင်းတွေ တိုက်တယ်။ ဒီလို လူမျိုးစုံကြားမှာ အရှိကို အရှိတိုင်း မြင်ပါတယ်ဆိုတဲ့ ကျွန်မတို့ရဲ့ လူထုခေါင်းဆောင်က အမှန် တရားဘက်က ဖြောင့်ဖြောင့်ကြီးရပ်တယ်။ လူထုခေါင်းဆောင်ကို အများက အမေလို့ခေါ်ကြတော့ ကျွန်မက သူများယောင် တိုင်း လိုက်မယောင်ချင်ဘူး။ ဒါကြောင့် သူပြောတဲ့စကားတွေကို နားထောင်ကြည့်တယ်။ လောကသဘာဝကို အရှိအတိုင်း မြင်နိုင်သူမို့ အမေစုပြောတဲ့စကားတွေဟာ ဓမ္မလမ်းကြောင်းပေါ်မှာရှိနေပါတယ်။ မေတ္တာစိတ်ကြီးမားတဲ့ သူမရဲ့မျက်နှာကို ကြည့်လိုက်တိုင်း မိခင်တဦးလို ရင်ထဲက လှိုက်လှိုက်လှဲလှဲ လေးစားကြည်ညိုစိတ် ချစ်ခင်စိတ် ဖြစ်မိပါတယ်။

ကျွန်မဘ၀မှာ မွေးမိခင်ရဲ့မေတ္တာကို အပြည့်အ၀ရခဲ့တယ်။ မိခင်ကဲ့သို့ ချစ်ခင်တတ်သော ဆရာသမားများရဲ့ မေတ္တာတွေကို လည်း ခံယူခဲ့ဖူးတယ်။ ချစ်ခြင်းမေတ္တာတွေအားလုံးထဲမှာ ပြည်သူတွေကိုချစ်တဲ့ အမေစုရဲ့ မေတ္တာကတော့ ကြီးမား ကျယ် ပြန့်တယ်။ ထူးခြား ခန့်ငြား ပါတယ်။ အမေစုက မြန်မာပြည်ရဲ့ မျှော်လင့်ချက်။ ဆင်းရဲဒုက္ခတွင်းက ရုန်းထွက်ဖို့ ကြိုးစားနေ သူတွေ၊ တရားမျှတ လွတ်လပ်ခွင့်နဲ့ ငြိမ်းချမ်းရေးကို ဆာလောင်နေကြသူတွေအတွက် အမေစုက ကောင်းကင်မေမေ။ အမေစုအပေါ် ပြည်သူတွေရဲ့ လေးစားကြည်ညိုမျိုးကို အာဏာနဲ့အနိုင်ကျင့်ပြီး အတင်းအကြပ်လေးစားခိုင်းလို့ မရနိုင်တာ တကယ့်အမှန်တရားပါ။ ပြည်သူချစ်တဲ့ အမေစုကို ကျွန်မလည်း ချစ်ခင်စိတ်ဖြစ်မိတာ မေတ္တာရောင်ပြန်ဟပ်ခြင်း၊ သက် ရောက်မှုတိုင်းအပေါ် တန်ပြန်သက်ရောက်ခြင်း နိယာမကြောင့်ပါ။

ကျွန်မရဲ့ မွေးမိခင်နဲ့ အမေစု၊ မတူညီတဲ့ လူနှစ်ယောက်ကို ကျွန်မ နှိုင်းယှဉ်ကြည့်မိပါတယ်။ ကျွန်မတို့ အမေက ပညာအရည် အချင်း (၇) တန်း၊ လယ်သမားဇနီးတယောက်ပါ။ အမေစုက အောက်စဖို့တက္ကသိုလ်ဆင်း ပညာရှင် မိုက်ကယ်အဲရစ်ရဲ့ ဇနီး။ အမေ့ရဲ့ဖခင် ကျွန်မတို့ အဖိုးက ငယ်ငယ်က ဘုန်းကြီးကျောင်းသား၊ အိမ်ထောင်ကျတော့ လယ်ယာအလုပ် အင်းအလုပ်နဲ့ အသက်မွေးတဲ့ အညတရ လယ်သမား အင်းသမား။ အမေစုရဲ့ ဖခင်က မြန်မာပြည်ရဲ့လွတ်လပ်ရေးဖခင် အာဇာနည်။ ဘ၀ပေး အခြေအနေ မတူညီကြတဲ့မိခင်နှစ်ဦးမှာ တူညီတဲ့အရည်အချင်းတွေကို ကျွန်မ ရှာကြည့်မိပါတယ်။ ရှေ့ဆောင်လမ်းပြ ကောင်းခြင်း၊ ဘိုးဘွားအမွေဖြစ်တဲ့ ရိုးသားခြင်း ဂုဏ်ပုဒ်ကိုစောင့်ထိန်း လက်ဆင့်ကမ်းခြင်း စတဲ့ မိခင်ကောင်းတို့ ရှိအပ်သော ဂုဏ်အရည်အချင်းတွေကို တွေ့ရပါတယ်။ အမေရင်းက ကျွန်မတို့ မောင်နှမတွေအတွက် ပဲ့ကိုင်ရှင်။ အမေစုက မြန်မာပြည်ရဲ့ ပဲ့ကိုင်ရှင်။

ခေါင်းဆောင်ကောင်း ပီသတဲ့ အမေစုက ဆင်ခြင်တုန်တရား အပြည့်နဲ့ ခရီးကြမ်းကို ဖြောင့်ဖြောင့်သွားတယ်။ လောကဓံ လှိုင်းလုံးတွေကို ကြံ့ကြံ့ခံ ရင်ဆိုင်တယ်။ စွန့်လွတ်အနစ်နာခံတယ်။ ဗိုလ်ချုပ်အောင်ဆန်းနဲ့ ဒေါ်ခင်ကြည်တို့ရဲ့ သမီးပီသစွာ ရိုးသားဖြောင့်မတ်တယ်။ မှန်သောစကားကို ပြောတယ်။ သီလရှိတယ်။ တိုင်းပြည်အပေါ် စေတနာမှန်တယ်။ ပြည်သူတွေကို ချစ်တယ်။ လူကို လူလို တန်ဖိုးထားတယ်။ ဒီဂုဏ်ပုဒ်တွေကြောင့် လူတွေက အမေစုကို ချစ်ခင်လေးစားကြတယ်။ လူထု လေးစား ထောက်ခံမှုအားကောင်းတာကို အာဏာရူးတွေက သွေးကွဲအောင်လုပ်တယ်။ မသိနားမလည်သူတွေ အမေစု အပေါ် အကြည်ညိုပျက်ကြတယ်။ ဒါတွေ ၂၀၁၀-၂၀၁၅ မှာ ဖြစ်ခဲ့တဲ့ သမိုင်းအမှန်။ တချို့လူတွေ အမေစုအပေါ် အကြည် ညိုပျက်သွားပေမဲ့ သူ့မှာရှိတဲ့ ကြည်ညိုလေးစားစရာဂုဏ်ပုဒ်တွေ ပျက်မသွားတာကလည်း တကယ့်အဖြစ်မှန်။ အမေစုရေး ခဲ့တဲ့ သမိုင်းက ကျောက်ထက်အက္ခရာတင်တာထက် ပိုခိုင်မြဲပါတယ်။

မိခင်ဆိုတာ သားသမီးတွေ ကောင်းစားရေးကို ရှေးရှုပြီး၊ ကောင်းသောလမ်းကို ညွှန်ပြကြပါတယ်။ ပြည်သူတွေကို ချစ်တဲ့ အမေစုကလည်း ပြည်သူတွေ မှန်ကန်သောလမ်းကြောင်းပေါ်မှာ ရပ်တည်နိုင်အောင် အမြဲလမ်းညွှန်ပြပါတယ်။ ကျွန်မတို့ အားလုံး မှန်ကန်သော လမ်းကြောင်းပေါ်မှာ ညီညီညာညာ လက်တွဲသွားကြရင် တိုင်းပြည်အနာဂတ်ကို ပြန်ပြီးအဖတ်ဆယ်နိုင် ပါတယ်။ ခုတော့ ထင်းအစည်းကပြေ၊ ငါနဲ့မတူ ရန်သူဖြစ်။ ပျက်နှာပြောင်တဲ့ အာဏာရူးတွေ ချယ်လှယ်သမျှကို စောင့် ကြည့်နေရတာ စိတ်မောရ အကုသိုလ်စိတ်တွေ ပွားများနေရပါတယ်။ တခါတလေ တိုင်းပြည် အကြောင်း မစဉ်းစားပဲ အေးရာအေးကြောင်း နေချင်စိတ် ဖြစ်မိပေမဲ့ နေလို့မရပါ။ အမေရင်းက ကျွန်မဘ၀တခုလုံးကို လွှမ်းမိုးထားသလို၊ အမေစုက ကျွန်မစိတ်ကို အတိုင်းအတာတခုလောက် လွှမ်းမိုးထားပါတယ်။ အမေစုအတွက် အသက်ကိုပေးရဲတယ်ဆိုတဲ့အထိ မဟုတ် ပေမဲ့၊ အမေစုရဲ့ ကြိုးပမ်းအားထုတ်မှုတွေကို ကူညီအားဖြည့်ပေးနိုင်ချင်ပါတယ်။

မနက်ဖြန်ဘာဖြစ်မလဲဆိုတာ ကျွန်မတို့ မသိနိုင်သလို၊ ၂၀၁၅ အကုန်မှာ တိုင်းပြည်ဘာဖြစ်မလဲဆိုတာ ဘယ်သူမှ အတိ အကျ မပြောနိုင်ပါ။ သေချာတာတခုက အမေစုသည် တိုင်းပြည်ရဲ့ကံကြမ္မာကို ကောင်းစေချင်ခဲ့တယ်။ မိဘတွေက သား သမီးတွေအားလုံး စည်းလုံးချစ်ခင်ကြပြီး ကောင်းစားစေချင်သလိုမျိုး။ ကောင်းစေချင်လို့ ညွှန်ပြတာကို လိုက်နာဆောင်ရွက်မှ ကောင်းလာနိုင်မှာ။ ဒါပေမဲ့လည်း အမှန်ကို မမြင်တတ်တဲ့လူတွေ အားကောင်းနေသရွေ့ တိုင်းပြည်ရဲ့ အနာဂတ်က ရင်လေးစရာ။ ကမ္ဘာ့အလယ်မှာ ကျွန်မတို့ မြန်မာတွေ မျက်နှာငယ် ရတဲ့ဘ၀က လွတ်ဖို့လမ်းရှိပေမဲ့ လမ်းမပွင့်သေးပါ။ အမှန် တရားကိုမြတ်နိုးတဲ့ ပြည်သူတွေရဲ့ တွန်းကန်အားကြောင့် ဒီလမ်းပွင့်ပါစေ၊ ရှေ့ဆောင်ကောင်းတဲ့ အမေစု ကျန်းမာပါစေလို့သာ ဆုတောင်းမိပါတယ်။။

စံပယ်ဖြူ
၂၅.၀၅.၂၀၁၅။

ဇင်လင်း - အစိုးရ ဘတ်ဂျက်လိုငွေပြတိုင်း ပြည်သူတို့အပေါ် အခွန်တိုးကောက်သင့်သလား?

ဇင်လင်း - အစိုးရ ဘတ်ဂျက်လိုငွေပြတိုင်း ပြည်သူတို့အပေါ် အခွန်တိုးကောက်သင့်သလား?
(မိုးမခ) မေ ၂၈၊ ၂၀၁၅

နိုင်ငံတနိုင်ငံဟာ ဖွံ့ဖြိုးတိုးတက်နေသလား၊ ဆုတ်ယုတ်ကျဆင်းနေသလားဆိုတာကို သိရှိလိုတဲ့အခါ အဲဒီနိုင်ငံရဲ့ ရသုံးမှန်း ခြေ ငွေစာရင်း (ဘတ်ဂျက်) ကို မကြည့်မဖြစ် ကြည့်ရပါတယ်။ ယေဘုယျအားဖြင့် ဘတ်ဂျက်သုံးမျိုးရှိပါတယ်။ ပိုငွေဘတ်ဂျက်၊ လိုငွေဘတ်ဂျက်နဲ့ ဘက်ညီ ဘတ်ဂျက် စသဖြင့် ဖြစ်တယ်။ လက်ရှိအစိုးရက လိုငွေ ဘတ်ဂျက်ပုံစံနဲ့ အမြဲသွားနေတာ တွေ့ ရတယ်။ ဘတ်ဂျက်လိုငွေပြမှုဟာ ပြီးခဲ့သည့် ၃ နှစ်တာကာလအတွင်း ကျပ်ဘီလီယံ ၇၂၀ဝ ကျော်ရှိတယ်လို့ စီးပွားရေး ပညာရှင်များက ပြောကြပါတယ်။ အဲဒီကိန်းဂဏန်းဟာ များပြားတဲ့ပမာဏဖြစ်တာကြောင့် အဲဒီငွေပမာဏ ပြည်သူလူထု အတွင်း လည်ပတ်သုံးစွဲ စီးဆင်းသွားခဲ့ရင်၊ ငွေကြေးဖောင်းပွမှု ဖြစ်ပေါ်မယ်လို့ စီးပွားရေးပညာရှင်တွေက သုံးသပ်ပါတယ်။ မြန်မာနိုင်ငံရဲ့ ငွေဖောင်းပွမှုနှုန်းက ၇ ဒသမ ၃ ရာခိုင်နှုန်းရှိနေကြောင်း၊ ကမ္ဘာ့ဘဏ်ရဲ့ မြန်မာ့စီးပွားရေး စောင့်ကြည့်ရေး အစီရင်ခံစာမှာ ဖေါ်ပြပါရှိခဲ့ပါတယ်။

ဒါကြောင့် နိုင်ငံရဲ့ဘတ်ဂျက်ငွေစာရင်းကိစ္စဟာ အလွန်အရေးကြီးပြီး နိုင်ငံသားတိုင်းနဲ့လည်း သက်ဆိုင်ပါတယ်။ ဒါပေမယ့် မြန်မာနိုင်ငံမှာ အာဏာရှင်အစိုးရအဆက်ဆက်က ရသုံးမှန်းခြေ ငွေစာရင်း (သိုမဟုတ်) နိုင်ငံတော်ဘတ်ဂျက်ဆိုတာ အုပ်ချုပ်သူ အစိုးရမင်းများနဲ့သာဆိုင်ပြီး သာမန်ပြည်သူတို့နဲ့ ဘာမှမပတ်သက်သယောင်ဖြစ်အောင် လုပ်ထားခဲ့ပါတယ်။ တကယ်တော့ အစိုးရတိုင်းရဲ့တာဝန်ဟာ လူထုကပေးဆောင်တဲ့အခွန်ငွေကိုသုံးစွဲပြီး နိုင်ငံနဲ့လူထု ဖွံ့ဖြိုးတိုးတက်စေဖို့ အတွက် တာဝန်ထမ်းရွက်ရတာဖြစ်တယ်။ လူထုရဲ့ ပညာရေး ကျန်းမာရေး လူနေမှုဘ၀ မြင့်မားတိုးတက်စေရေးအတွက် ဘတ်ဂျက်ကို စနစ်တကျ စီမံရေးဆွဲသုံးစွဲရခြင်းဟာ အစိုးရတာဝန်ပဲ။ အစိုးရရဲ့ ဘတ်ဂျက်စီမံခန့်ခွဲပုံ ညံ့ဖျင်းရင် ကုန်ဈေးနှုန်း တက်မယ်။ ကုန်ထုတ်လုပ်မှုကျဆင်းမယ်။ အလုပ်လက်မဲ့ပြဿနာပေါ်မယ်။ ပြည်ပအကြွေး ထူပျောလာမယ်။ ငွေကြေးဖေါင်း ပွမယ်။ အလုပ်သမား လယ်သမားတွေ ဆင်းရဲမွဲတေမယ်။ နိုင်ငံရဲ့လူသားအရင်းအမြစ်တွေ တခြားနိုင်ငံတွေဆီ ရွှေ့ပြောင်း ရောက်ရှိသွားမယ်။ ဒုစရိုက်မှုတွေလည်း စံချိန်တင် များပြားလာမယ်။ အကျိုးဆက်က နိုင်ငံရေးမတည်မငြိမ်ဖြစ်မယ်။

ဒါကြောင့် ဘတ်ဂျက်အရေးကိစ္စဟာ အာဏာရပါတီတရပ် အာဏာရအစိုးတရပ်က ငါကြိုက်တာ ငါလုပ်မယ်ဆိုတာမျိုး မလုပ်သင့်ပါ။ ဘတ်ဂျက် ဘဏ္ဍာငွေများဟာ ပြည်သူလူထုထံကကောက်ယူထားတဲ့ အခွန်ငွေအရပ်ရပ်က လာတာဖြစ်လို့သုံးစွဲ တဲ့အခါ ပြည်သူ့ကိုယ်စားလှယ်များနဲ့တော့ အနိမ့်ဆုံး အကျေအလည်ညှနှိုင်းဖို့ လိုပါတယ်။ လမ်းဖေါက်ဖို့၊ တံတားဆောက်ဖို့၊ ကျောင်းဆောက်ဖို့၊ ဆည်ဆောက်ဖို့ စသဖြင့် ချပေးလိုက်တဲ့ ဘတ်ဂျက်ရံပုံငွေဟာ အမှန်တကယ် ရည်မှန်းချက် ပေါက် မြောက်အောင် အသုံးပြုရဲ့လားဆိုတာ သေချာဖို့လိုပါတယ်။ ဒီတာဝန်ကို ပြည်သူ့လွှတ်တော်ကိုယ်စားလှယ်များကိုဖြစ်စေ၊ အစိုးရမဟုတ်တဲ့ လူထုလူတန်းစား အဖွဲ့အစည်းများကို ဖြစ်စေ၊ မီဒီယာကိုဖြစ်စေ ဆက်လက်စောင့်ကြည့်ခွင့်ပေးဖို့ လိုပါ တယ်။ ဒါပေမယ့် ဒီလိုစောင့်ကြည့်ခွင့်ကို လွှတ်တော်ကိုယ်စားလှယ်များကိုတောင် ခွင့်မပြုဘူးလို့ လွှတ်တော်ကိုယ်စားလှယ် တဦးကပြောပါတယ်။ ဒါဟာ မဖြစ်သင့်တဲ့ကိစ္စပါပဲ။ ကိုယ်ကျင့်တရားပျက်ပြားစေဖို့ (Corruption) အားပေးရာ ရောက်ပါ တယ်။ တကယ်တော့ ဘတ်ဂျက်ရေးရာကိစ္စတွေမှာ ပြည်သူလူထု စိတ်ပါဝင်စားစွာပါဝင်လာအောင် အစိုးရက ပညာပေးသင့် ပါတယ်။ လူထုရဲ့အသံနဲ့ ထင်မြင်ယူဆချက်တွေကို အစိုးရက နားထောင်ဖို့လိုပါတယ်။

၂၀၁၅ မေလ၂၄ ရက်၊ တနင်္ဂနွေနေ့က ၀မ်းသာစရာ ဘတ်ဂျက်ဆွေးနွေးဝိုင်း တခုကျင်းပတာတွေ့ရပါတယ်။ အမျိုးသား စီးပွားရေးနှင့် လူမှုရေးဆိုင်ရာ အကြံပေးအဖွဲ့ (National Economic and Social Advisory Council - NESAC) ၊ မြန်မာနိုင်ငံ ကုန်သည်စက်မှုအသင်းချုပ် (UMFCCI) နှင့် ActionAid Myanmar တို့ ပူးပေါင်းစီစဉ်ကြတဲ့ မြန်မာနိုင်ငံ ရသုံးဘတ်ဂျက် စားပွဲဝိုင်း ဆွေးနွေးပွဲ UMFCCI ခမ်းမမှာ ကျင်းပခဲ့ပါတယ်။ ဆွေးနွေးပွဲမှာ စီးပွားရေးပညာရှင်တွေ၊ နိုင်ငံရေးပါတီ ကိုယ်စား လှယ်တွေ၊ လွှတ်တော်အမတ်တွေ၊ အရပ်ဘက်အဖွဲ့ အစည်းများနဲ့ သတင်းမီဒီယာက ပုဂ္ဂိုလ်တွေ ပါဝင်ဆွေးနွေးခဲ့ကြပါတယ်။ စာရေးသူလည်း လေ့လာသူအဖြစ် တက်ရောက်ခဲ့ပါတယ်။

Post Budget Consultation on Myanmar 2015 - 2016 လို့ခေါင်းစဉ်တင်ထားတဲ့ ဆွေးနွေးပွဲမှာ  လူသားအရင်းအမြစ် ဖွံ့ဖြိုးရေး ကျောင်းရဲ့ သင်တန်းမှူးချုပ် ဦးဇော်ဖေဝင်း၊ အသုံးချဘောဂဗေဒ ပညာရှင် ဦးစောနိုင်၊ အမျိုးသားဒီမိုကရေစီအဖွဲ့ချုပ် ပြည်ထောင်စု လွှတ်တော်ကိုယ်စားလှယ်များဖြစ်ကြတဲ့ ဒေါ်ခင်စန်းလှိုင်နဲ့ ဒေါ်စန္ဒာမင်း၊ စီးပွားရေးပညာရှင် ဦးမင်းခင်၊ ရန် ကုန်တိုင်းဒေသကြီး လွှတ်တော်ကိုယ်စားလှယ် ဒေါ်ညိုညိုသင်း၊ ပြည်သူ့လွှတ်တော် ငွေကြေးပူးပေါင်းကော်မတီ အတွင်းရေး မှူး ဦးမောင်တိုး၊ နယ်စပ်ကုန်သွယ်ရေးဌာန အငြိမ်းစား ညွှန်ကြားရေးမှူး ဦးမြင့်အောင်၊ အမျိုးသားစီးပွားရေး နှင့် လူမှုရေး အကြံပေးကောင်စီ (NESAC) ဒါရိုက်တာ ဦးဇီဝနိုင်တို့က တက်ရောက်ဆွေးနွေးခဲ့ကြတာ မေးခွန်းတွေကို ဖြေကြားခဲ့ကြတာ တွေ့ရပါတယ်။ မဇ္ဈိမမီဒီယာ အယ်ဒီတာချုပ် ဦးစိုးမြင့်က အခမ်းအနားမှူးအဖြစ် ဆောင်ရွက်ခဲ့ပါတယ်။

တကယ်တော့ နိုင်ငံတခုရဲ့ ဘတ်ဂျက်ငွေစာရင်းဆိုတာ နိုင်ငံရဲ့အခွန်ငွေအရပ်ရပ်ကို စီမံခန့်ခွဲ သုံးစွဲရတာဖြစ်လို့၊ အစိုးရ အနေနဲ့ ပွင့်လင်းမြင်သာမှုရှိရှိ၊ တာဝန်ခံမှုအပြည့်နဲ့၊ တိုင်းပြည်နဲ့လူထုအကျိုးကို ရှေးရှု ရေးဆွဲရမှာဖြစ်ပါတယ်။ ဒါပေမယ့် မြန်မာပြည်သူလူထုဟာ စစ်အာဏာရှင် အစိုးရအဆက်ဆက်မှာ တိုင်းပြည်ရဲ့ဘတ်ဂျက်ငွေစာရင်းကို ဘယ်လိုရေးဆွဲပြီး ဘယ်သူတွေက ဘယ်လို သုံးစွဲခဲ့ ကြမှန်း လုံးလုံးမသိခဲ့ကြပါ။  အခု ဦးသိန်းစိန် အစိုးရ စီမံခန့်ခွဲတဲ့ ဘတ်ဂျက်ငွေစာရင်းကိုလည်း လူထုက ဘာမျှ ဂဃနဏ သိခွင့်မရကြပါဘူး။ သန်းငါးဆယ်ကျော် ပြည်သူတဦးချင်းစီမှာ အကြွေး ၅ သိန်းကျော်စီ် တင်ရှိ နေတယ်လို့ပဲ သတင်းတွေအရ ကြားသိနေရပါတယ်။ အခု မြန်မာနိုင်ငံရဲ့ ၂၀၁၅-၁၆ ဘဏ္ဍာနှစ် နိုင်ငံတော် ရသုံးမှန်းခြေ ငွေစာရင်း (ဘတ်ဂျက်)ဆိုင်ရာ စားပွဲဝိုင်းဆွေးနွေးပွဲကျမှ သိလိုက်ရတာက သမ္မတဦးသိန်းစိန်ရဲ့ ၄ နှစ်တာ အုပ်ချုပ်မှုကာလ အတွင်း ဘတ်ဂျက်လိုငွေပြမှု ကျပ်ဘီလီယံ တသောင်းကျော်အထိ မြင့်တက်လာတယ် ဆိုခြင်းပါပဲ။ ဒါဟာ အစိုးရအနေနဲ့ လူထုပုခုန်းပေါ် အလွန်ကြီးလေးတဲ့ ၀န်ထုပ်ဝန်ပိုးကို မညှာမတာ တင်ပေးလိုက်တဲ့သဘောပါပဲ။

ဆွေးနွေးပွဲမှာ စီးပွားရေးပညာရှင် ဦးဇော်ဖေ၀င်းက “ဒီအစိုးရရဲ့ ၄ နှစ်တာမှာ ဘတ်ဂျက်လိုငွေ ကျပ်ဘီလီယံ တသောင်းဆို တော့ တိုင်းပြည်စီးပွားရေး အခြေအနေနဲ့ကြည့်ရင် အတော်ကိုစိုးရိမ်စရာပါ။ ကုန်သွယ်မှုလည်း အရမ်းကြီးရှိသေးတာ မဟုတ်ဘူး၊ အခွန်ကလည်း အရမ်းကြီးမရသေးဘူး” လို့ ဝေဖန်တာတွေ့ရပါတယ်။ အရပ်သားအစိုးရ လေးနှစ်တာဘတ်ဂျက် ရေးဆွဲချမှတ်သုံးစွဲပုံဟာ  လိုငွေပြဘတ်ဂျက်တွေဖြစ်နေတာကြောင့် နောင်အနာဂတ်အစိုးရတွေအတွက် ၀န်ထုတ်ဝန်ပိုး ဖြစ် လာနိုင်တယ်လို့ ဦးဇော်ဖေ၀င်းက သုံးသပ်ပြပါတယ်။ ဒီအခြေအနေက ဘာကိုပြသနေသလဲဆိုရင် လက်ရှိအစိုးရ သက်တမ်း တလျှောက်လုံးမှာ ရရှိငွေထက် သုံးစွဲငွေက အလွန်အကျွံ ပိုမိုများပြားနေတယ်ဆိုတာ သက်သေပြနေပါတယ်။ ဒီလိုဖြစ်ရတာ ကလည်း ပြည်သူ့ဘဏ္ဍာငွေကို ခန့်ခွဲသုံးစွဲရာမှာ ပြည်သူတွေ ပါဝင်စောင့်ကြည့်ခွင့်မရအောင် ကန့်သတ်ထားတဲ့အတွက် ကြောင့်ပါပဲ။ လွှတ်တော်ကိုယ်စားလှယ်တွေသည်ပင်လျှင် လွှတ်တော်ကျင်းပစဉ်ကာလအတွင်းမှာသာ ဝေဖန်ထောက်ပြခွင့် ရတယ်လို့ဆိုပါတယ်။ ဝေဖန်သုံးသပ်ဖို့ လုံလောက်တဲ့ အချိန်မပေးတဲ့သဘောပါပဲ။ တနည်းအားဖြင့် ပွင့်လင်းမြင်သာမှု၊ တာ ၀န်ယူမှု၊ တာဝန်ခံမှုမလုပ်လိုတဲ့သဘောဖြစ်ပါတယ်။

ရသုံးဘတ်ဂျက် စားပွဲဝိုင်းဆွေးနွေးပွဲမှာ ပြည်ထောင်စုလွှတ်တော် ငွေစာရင်းပူးပေါင်းကော်မတီ အတွင်းရေးမှူး ဦးမောင် တိုးက “၂၀၀၈ ဖွဲ့စည်းပုံအခြေခံဥပဒေမှာ ဘတ်ဂျက်ကော်မတီဆိုပြီး သီးခြားဖွဲ့စည်းနိုင်တာမရှိတဲ့အတွက် လွှတ်တော်က ဘတ်ဂျက်စိစစ်မှု အပြည့်အ၀မလုပ်နိုင်တာ တွေ့ရှိပါတယ်။ အရင်ထက်စာရင်တော့ ပွင်လင်းမြင့်သာမှုပိုတိုးလာတယ်ဆိုပေမယ့် အားရတဲ့အခြေအနေတော့ မရှိသေးပါဘူး” လို့ ဆိုပါတယ်။

ဘတ်ဂျက်ကိစ္စက နိုင်ငံ့အရေးအရာအရပ်ရပ်ရဲ့ ဆုံချက်ဖြစ်နေတာကိုလည်း သတိပြုသင့်ပါတယ်။ လက်ရှိ မြန်မာနိုင်ငံရဲ့ ဥပမာ တချို့ကို ကြည့်ပါ။ အစိုးရနဲ့ တပ်မတော်တို့ရဲ့သဘောထားတွေ ဟန်ချက်မညီမှုကြောင့်၊ ပြည်တွင်းငြိမ်းချမ်းရေးဟာ အခုထိ မရေရာ မသေချ ဖြစ်နေပါတယ်။ ဒီတော့ ကာကွယ်ရေးစရိတ်က ဘတ်ဂျက်မှာ အမြင့်ဆုံးဖြစ်လာတယ်။ GDP ရဲ့ လေးပုံတပုံလောက်ဖြစ်လာတယ်။ ဒီတော့ လူထုအတွက် ၀န်ထုပ်ဝန်ပိုးဖြစ်လာတယ်။ တဖက်မှာ ပညာရေး ကျန်းမာရေး အသုံးစရိတ်ကို တိုးမပေးနိုင်ဖြစ်ရတယ်။ အမြော်အမြင်ရှိတဲ့ အစိုးရတိုင်းဟာ ပညာရေးနဲ့ကျန်းမာရေးကို မြှင့်တင်ပြီး ရင်းနှီးမြှုပ်နှံမှုလုပ်ကြတယ်။ တိုင်းပြည်မှာ ကျန်းမာသန်စွမ်းပြီး ဉာဏ်ရည်မြင့်တဲ့ လူသားအရင်းအမြစ်တွေရရှိဖို့အတွက် ပညာရေးနဲ့ ကျန်းမာရေးအသုံးစရိတ်ကို ဘတ်ဂျက်မှာ အလုံအလောက်သတ်မှတ်ပေးဖို့လိုပါတယ်။ ဒီကိစ္စဟာ နိုင်ငံနဲ့ပြည် သူရဲ့ အနာဂတ်ကောင်းဖို့ မလုပ်မဖြစ် လုပ်ရမယ့်အလုပ်လည်းဖြစ်ပါတယ်။

အစိုးရဘတ်ဂျက်ရေးဆွဲမှု မျှတခြင်း မမျှတခြင်း ကောင်းခြင်း ဆိုးခြင်းတို့ရဲ့သက်ရောက်မှုဟာ ပြည်သူလူထုနဲ့နိုင်ငံရဲ့ ကံကြမ္မာ အကောင်းအဆိုးကို ဖန်တီးပါတယ်။ ဘတ်ဂျက်မှာ ကာကွယ်ရေးစရိတ် မြင့်နေသမျှ ပြည်သူလူထု ဆင်းရဲဖို့ပါပဲ။ ဒါထက်ဆိုးတာက ဘတ်ဂျက်ငွေကြေးတွေကို ၀န်ကြီးဌာနတွေအတော်များများမှာ အလွဲသုံးစားမှုတွေ ရှိနေခြင်းပါပဲ။ ဒီလို ငွေကြေးယိုဖိတ်နေတဲ့ အမှုအခင်းတွေကို အစိုးရက မြန်မြန်ဆန်ဆန်အရေးယူဖို့ လက်တွန့်နေခြင်းဟာလည်း လက်ရှိနိုင်ငံရေး ပြုပြင်ပြောင်းလဲမှုကို အကြီးအကျယ် ထိခိုက်စေပါတယ်။

လက်ရှိ ဦးသိန်းစိန် အစိုးရရဲ့ လေးနှစ်တာဘတ်ဂျက်ရေးဆွဲမှုဟာ တလျှောက်လုံး လိုငွေပြဘတ်ဂျက်သာဖြစ်နေတာကြောင့် ပြည်ပချေးငွေတွေ မတန်တဆအတိုးတွေနဲ့ ချေးယူနေတာတွေ့နိုင်တယ်။ နောက် ပြည်သူလူထုဆီက အခွန်ငွေ တိုး ကောက်တာတွေ လည်း မြင်နေရတယ်။ အခု နောက်ဆုံး လူထုအကြားမှာ ဂယက်ရိုက်ခတ်နေတဲ့ တယ်လီဖုံးသုံးစွဲမှုအပေါ် အခွန်  ၅ ရာခိုင်နှုန်းကောက်မယ့်ကိစ္စဟာ  ထင်ရှားပါတယ်။ တိုင်းပြည် ဖွံ့ဖြိုးတိုးတက်ဖို့ အဖက်ဖက်က အများကြီးလို အပ်နေဆဲကာလမှာ တယ်လီဖုံးဆက်သွယ်ရေးအတွက် အခုလို အခွန်ကောက်ယူခြင်းဟာ သမ္မတဦးသိန်းစိန်ပြောလေ့ရှိတဲ့ ဆင်းရဲမွဲတေမှုလျှော့ချရေးစီမံချက်နဲ့ လွဲချော်နေတာလည်း တွေ့မြင်နေရပါတယ်။ ခရိုနီသူဌေးတွေနဲ့ သာမန်ပြည်သူတွေကို တန်းတူ အခွန်ဆောင်ခိုင်းသလိုလည်းဖြစ်နေပါတယ်။ အမှန်တော့ ဆင်းရဲချမ်းသာကွာဟမှုအပေါ် တွက်ချက်ချိန်ဆပြီး အခွန်ကောက် သင့်ပါတယ်။

အစိုးရဘတ်ဂျက် လိုငွေပြတဲ့အခါတိုင်း အခွန်တိုးကောက်တာကလည်း အစဉ်အလာဖြစ်နေပါတယ်။ ဘတ်ဂျက်လိုငွေ ပြတိုင်း လူထုကိုပဲ လည်ပင်းညှစ်တာကတော့ မလုပ်သင့်တဲ့ကိစ္စလို့ထင်ပါတယ်။ လက်ရှိအစိုးရရဲ့ ဖွဲ့စည်းပုံကို ကြည့်ရင် ဖေါင်းပွလွန်းနေတယ်။ ၀န်ကြီးဌာနက ၃၆ ခုလောက်ရှိနေတာကို ကျစ်ကျစ်လစ်လစ်ဖြစ်အောင် လျှော့ချခြင်းအားဖြင့်လည်း ဘတ်ဂျက်လိုငွေကို လျှော့ချနိုင်ပါတယ်။ အရှုံးပေါ်နေတဲ့ဝန်ကြီးဌာနတွေကို ဖျက်သင့်ရင်ဖျက်၊ ပေါင်းသင့်ရင်ပေါင်း လုပ်သင့် ပါတယ်။ အလုပ်သင့်ဆုံးအလုပ်ကတော့ တပ်မတော်လက်ဝယ်ရှိတဲ့ စီးပွားရေးလုပ်ငန်းတွေကို တကယ်လုပ်ငန်းကျွမ်း ကျင်နားလည်သူတွေ လက်ထဲလွှဲပြောင်းပေးခြင်းဖြင့် နိုင်ငံအတွက် အခွန်တော်ငွေ တိုးတက်ရရှိအောင်ဆောင်ရွက်သင့်ပါတယ်။ တပ်မတော်အနေနဲ့ စီးပွားရေးလုပ်နေတာ ဘယ်လိုပဲကြည့်ကြည့် မသင့်တော်ပါဘူး။ အကျိုးစီးပွားပဋိပက္ခ (Conflict of Interests) လည်း ဖြစ်စေပါတယ်။ သိက္ခာရှိတဲ့ တပ်မတော်အနေနဲ့ ကာကွယ်ရေးကိုပဲ စံချိန်စံညွှန်းအပြည့်နဲ့ အာရုံစိုက်လုပ်သင့်ပါတယ်။ တပ်မတော်က မလိုအပ်ဘဲ လယ်ယာမြေတွေသိမ်းယူထားတဲ့အတွက်လည်း စိုက်ပျိုးရေးကုန် ထုတ်လုပ်မှု ကျဆင်းစေပါတယ်။ လယ်ယာလုပ်သားတွေ အလုပ်လက်မဲ့ ဖြစ်စေတယ်။ တပ်ဖက်မှာ မြေယာပိုင်ဆိုင်လိုမှု လောဘတွေကြောင့် တပ်ရဲ့စည်းလုံးညီညွတ်မှုနဲ့ဂုဏ်သိက္ခာ ထိခိုက်ပျက်စီးမှုလည်းဖြစ်စေတယ်။ လက်ရှိ သတင်းတွေအရ တပ်ဖက်ဆိုင်ရာက လုပ်ကိုင်နေတဲ့ စီးပွားရေးလုပ်ငန်းတွေက အခွန်ငွေမှန်မှန်ကန်ကန် ပေးသွင်းမှု ရှိ/မရှိ ဆိုတာလည်း မေးခွန်းထုတ်စရာဖြစ်နေပါတယ်။ အဆိုးဆုံးအချက်ကတော့ မြန်မာနိုင်ငံမှာ အစဉ်အဆက် ယုံကြည်အားထားကိုးကား လောက်တဲ့ စာရင်းအင်းဆိုင်ရာ သုတေသနနဲ့ မှတ်တမ်းဆိုင်ရာ မော်ကွန်းတိုက်တွေ မရှိခဲ့ခြင်းဖြစ်ပါတယ်။ ဒါကြောင့် မခိုင် လုံတဲ့ စာရင်းအင်း အချက်အလက် တွေကို မဏ္ဍိုင်ပြုပြီး ဘတ်ဂျက်ရေးဆွဲတာ၊ လူထုကို အခွန်ကောက်ခံနေတာဟာလည်း တိုင်းပြည်ကို အလွန်ထိခိုက်နစ်နာစေပါတယ်။

ရန်ကုန်တိုင်း ဒေသကြီး လွှတ်တော်ကိုယ်စားလှယ် ဒေါ်ညိုညိုသင်း၊ရဲ့ အဆိုအရ ပြည်ထောင်စု အဆင့်မှာ ပြည်သူ့ငွေစာရင်း ကော်မတီဆိုတာ ရှိတယ်။ နောက် စာရင်းစစ်ချုပ်အစီရင်ခံစာဆိုတာကလည်း ၆ လ တကြိမ်ထွက်နေတယ်။ ဒါပေမယ့် တိုင်း နဲ့ပြည်နယ် ၁၄ ခုစလုံးမှာ စာရင်းစစ်ချုပ် အစီအရင်ခံစာမထွက်ဘူး။ အခု လက်ရှိ ရန်ကုန်တိုင်းဆိုရင် ၂၀၁၁-၁၂ ဘဏ္ဍာ ရေးနှစ် အစီရင်ခံစာနဲ့ ၂၀၁၂-၁၃ ဘဏ္ဍာရေးနှစ်အစီရင်ခံစာ (၂) ခုပဲ ထွက်သေးတယ်။ အဲဒီတော့ ၂၀၁၃-၁၄ နဲ့ ၂၀၁၄-၁၅ ဘဏ္ဍာနှစ်အတွက် ၆ လစာ (၂) ကြိမ်ဆိုတော့ (၄) ကြိမ် အစီရင်ခံစာ မထွက်သေးဘူးလို့ဆိုတယ်။  လွှတ်တော်က နောက် တကြိမ် နှစ်ကြိမ်ဆိုရင် ပြီးပြီဆိုတော့၊ ၂၀၁၄-၁၅ ဘဏ္ဍာနှစ်ထဲမှာ ရန်ကုန်တိုင်းက သုံးသွားတဲ့ ကျပ်ငွေ ဘီလျံ ၄၀၀ ကို ဘယ်လိုသုံးသွားတယ်ဆိုတာကို သိခွင့်မရှိတော့ဘူး လို့ပြောပါတယ်။ နောက် တိုင်းဒေသကြီးအဆင့် ပြည်သူ့ငွေ စာရင်း ကော်မတီရှိသင့်ကြောင်း လွှတ်တော်မှာတင်ပြတိုင်း ၀န်ကြီးချုပ်နဲ့ ရန်ကုန်တိုင်းအစိုးရက ကန့်ကွက်တာခံရကြောင်း ဒေါ်ညို ညိုသင်းက ပြောပါတယ်။ ဒီဖြစ်စဉ်အရ ၀န်ကြီးဌာနအသီးသီး၊ အစိုးရအဖွဲ့အစည်းအဆင့်ဆင့်မှာ  ဘတ်ဂျက်ငွေ သုံးစွဲမှုနဲ့ ပတ်သက်လို့ Check and Balance အပြန်အလှန်ထိန်းကျောင်းမှုမရှိတာ ပေါ်လွင်ပါတယ်။ ဒါကြောင့် သမ္မတ ဦးသိန်းစိန် အစိုးရ ၄ နှစ်တာကာလအတွင်း “ဘတ်ဂျက်ယိုဖိတ်ငွေ” ကျပ်ဘီလီယံ တသောင်းကျော်အထိရှိခဲ့တဲ့အတွက် ပြည်သူတွေ နစ်နာလွန်းလှပါတယ်။

အစိုးရတရပ်ရဲ့ ကောင်းခြင်း ဆိုးခြင်း အောင်မြင်ခြင်း ရှုံးနိမ့်ခြင်းဆိုတဲ့ပုံရိပ်တွေဟာ ဘတ်ဂျက်စီမံခန့်ခွဲမှု နည်းနာတွေရဲ့ အကျိုးဆက် ဖြစ်ပါတယ်။ အစိုးရကို လူထုက ထောက်ခံမှုပေးရာမှာ ဘတ်ဂျက်ခွဲဝေသုံးစွဲမှုမျှတခြင်းကို ကြိုက်နှစ်သက်ခြင်း ကလည်း အရေးကြီးတဲ့ အကြောင်းတခုပါပဲ။ ပြည်သူ့အခွန်ဘဏ္ဍာ ယိုဖိတ်လေလွင့်အောင် ဘတ်ဂျက်စီမံခန့်ခွဲခဲ့တဲ့ အစိုးရ မျိုးကို လူထုက ဆက်လက်ထောက်ခံမှာ မဟုတ်တာကတော့ သေချာပါတယ်။ ဦးသိန်းစိန်အစိုးရက ဘတ်ဂျက်လို ငွေပြတိုင်း လူထုဆီကပဲ အခွန်တိုးကောက်နေပါတယ်။ အထူးသဖြင့် ဆင်းရဲသားပြည်တွေဆီကပဲ အခွန်အမျိုးမျိုးကောက် ယူနေပါ တယ်။ ဒါဟာ လူထုပုခုံးပေါ်ကို ၀န်ထုပ်ဝန်ပိုး အထပ်ထပ်တင်ပေးနေတဲ့သဘောပါပဲ။

ဝန်ကြီးဌာနတွေ ၀န်ကြီးအရေအတွက်တွေ လျှော့ချသင့်ပါလျှက် မချနိုင်တာ ဘာကြောင့်ပါလဲ။ ပြည်ပခြိမ်းခြောက်မှုမရှိပါ ဘဲနဲ့ စစ်အင်အား လျှော့မချနိုင်တာကလည်း ဘာကြောင့်ပါလဲ။ တိုင်းပြည်ရဲ့ အဓိက ကုန်ထုတ်လုပ်နိုင်စွမ်းဟာ လယ်ယာ စိုက်ပျိုးရေးကဏ္ဍဖြစ်ပါလျှက် စိုက်ပိုးရေးကုန်ထုတ်လုပ်မှုမလုပ်တတ်တဲ့ တပ်မတော်ကို မြေယာ ဧကပေါင်းသိန်းချီ သိမ်းယူ ခွင့်ပေးထားတာကလည်း ဘာကြောင့်ပါလဲ။ အကျိုးဆက်က လယ်သမားတွေ မြေမဲ့ ယာမဲ့ဖြစ်ရပြီး အိမ်နီးချင်နိုင်ငံတွေဆီမှာ မျက်နှာအောက်ချ ကျွန်ခံကြရတယ်။ နိုင်ငံရဲ့ဂုဏ်သိက္ခာ ထိခိုက်ရတဲ့အထိ ဖြစ်ရတယ်။ ဒီကိစ္စတွေဟာ အစိုးရရဲ့ ဘတ်ဂျက် ရေးဆွဲရာမှာ လိုငွေပြနေခြင်းနဲ့ တကြောင်းမဟုတ် တကြောင်း ဆက်စပ်ပတ်သက်နေပါတယ်။ ဒေသတွင်းမှာ မြန်မာနိုင်ငံ အောက်တန်း နောက်တန်းကျရောက်ခဲ့ရခြင်းရဲ့ ပဓာနအကြောင်းဟာ ဘတ်ဂျက်စီမံခန့်ခွဲမှု ညံ့ဖျင်းခြင်းကြောင့်လို့ ကောက် ချက်ချနိုင်ပါတယ်။  ဒါကြောင့် နောင် အစိုးရများအနေနဲ့ ခါးသီးလေးလံလှတဲ့ ဘတ်ဂျက်ဝန်ထုပ်ဝန်ပိုးတွေကို လူထုပုခုံးပေါ် ဇွတ် အဓမ္မထိုးတင်တာမျိုး မလုပ်မိကြဖို့ ဇွတ် အဓမ္မ အခွန်ငွေကောက်ခံတာမျိုး မလုပ်မိကြဖို့ လေးလေးနက်နက် စဉ်းစား ကြစေချင်တယ်။ အစိုးရကောင်းဖြစ်ချင်ရင်၊ ကောင်းမွန်တဲ့အုပ်ချုပ်ရေးကို ထူထောင်ချင်ရင်၊ လူထုအကျိုးဖော်ဆောင်မယ့် ဘတ်ဂျက်၊ လူထုအတွက် ၀န်ထုပ်ဝန်ပိုးမဖြစ်စေမယ့် ဘတ်ဂျက်မျိုးကိုသာ ရေးဆွဲကြစေလိုကြောင်းပါ ...။။

စောဝေ - အဖေတူသားများ

  စောဝေ - အဖေတူသားများ
(မိုးမခ) မေ ၂၇၊ ၂၀၁၅

အနှစ်သာရတွေပြောပြီး
အကာတွေပဲ လုပ်ခဲ့တယ်။

အများအတွက် ကြွေးကြော်ပြီး
ကိုယ်ကျိုးစီးပွားပဲ လုပ်ခဲ့တယ်။

ဂလိုဘယ် (လ်) လိုက်ဇေးရှင်းပြောပြီး
တမိန့်တအာဏာပဲ သုံးခဲ့တယ်။

နိုင်ငံရေးအကျဉ်းသားမရှိဘူးပြောပြီး
နိုင်ငံရေးပါတီဖွဲ့ပြီး အနိုင်ယူအုပ်ချုပ်တယ်။

ဖက်ဆစ်နဲ့ ကွန်မြူနစ်ကို မုန်းတယ်ပြောပြီး
မြောက်ကိုရီးယားလို ဆက်ဆံကျင့်သုံးခဲ့တယ်။

ငြိမ်းချမ်းရေရးကို လိုလားတယ်ဆိုပြီး
လက်နက်ကျည်ဆံတွေနဲ့ပဲ အဖြေရှာတယ်။

လွတ်ငြိမ်းချမ်းသာခွင့်ဆိုပြီး
ခိုး၊ ဆိုး၊ ဓါးပြ၊ ဘိန်း၊ မုဒိမ်းတွေပဲ လွှတ်ပေးတယ်။

ကြိုဆိုပါတယ် ကြိုဆိုပါတယ်ဆိုပြီး
ဒေါ်စုကြည်လို့ပဲ သုံးစွဲနေတယ်။

ဒီမိုကရေစီဆိုပြီး
ကမ္ဘာကြီးကို မျက်လှည့်ပြဖို့ ကြိုးစားတယ်။

ကိုသန်းလွင် - ကျောင်းကောင်စီ

ကိုသန်းလွင် - ကျောင်းကောင်စီ
(မိုးမခ) မေ ၂၇၊ ၂၀၁၅

(၁)
သားတို့ကျောင်းကဖိတ်စာ တစောင်ပို့လိုက်သည်။ ဖိတ်စာကဒ်မှာ လက်တင်စာတွေရေးထားပါသည်။ “Legatum Pei durantes”  လက်တင်စာမတတ်သောကြောင့် ဘာအကြောင်းရယ်မသိရ၊ Stundent Conncil Investiture” ဟုရေးထား သည်ကိုတွေ့တော့မှ သားတို့ကျောင်းက ကျောင်းကောင်စီကဖိတ်တာဘဲဟု သဘောပေါက်သည်။

ကျွန်တော့်သားတက်နေသောကျောင်းမှာ ဂျူရောင်း ဂျူနီယာကောလိပ် (Jurong Junior Colleage) ဖြစ်ပါသည်။ အာအိုင် တီက ကျောင်းပြီးသောမိတ်ဆွေတဦး၏သားက   တီမားဆက်ကောလိပ်မှာ၊ ဖေ့ (စ်) ဘုခ်တွင် သူတို့သား ကျောင်းကောင်စီ မင်ဘာဖြစ်သောကြောင့် တာဝန်ပေးအပ်ပွဲကို သူတို့သွားတက်ကြကြောင်း သတင်းပေးထားတာကို သွားပြီးသတိရမိသည်။ ကျွန်တော်တို့အဖို့ သည်လိုပွဲကို အလွတ်မခံနိုင်ပါ၊ RSVP  ခေါ် အခမ်းအနားတက်မည်ဆိုလျှင် အကြောင်းပြန်ပါဆိုသော  ဖိတ်ခေါ်စာကို သားကနားမလည်၊ “စာပြန်လိုက်ပေါ့သားရဲ့” ဟု ပြောရသည်။ ဖိတ်စာပေါ်မှာ အီးမေးလ်လိပ်စာပါပါသည်။ သားတို့ ဂျူရောင်းကောလိပ်ကို ယခင်က ကျွန်တော်မရောက်ဖူးပါ။ အထက်တန်းကျောင်းသားတွေမှာ O’ level  အောင် သည်နှင့် ဂျူနီယာကောလိပ် သွားမလား၊ ပိုလီကျောင်းတွေသွားမလားဟု ရွေးစရာဖြစ်လာသည်။ Polytechnic  ဆိုသည်မှာ မြန်မာပြည်က ဂျီတီအိုင်ကျောင်းတွေလို အလုပ်ခွင်မှာ အလုပ်ကျွမ်းကျင်ရေးကို ဦးစားပေးသည့်ကျောင်းတွေဖြစ်ပါသည်။ ကျောင်းပြီးသော် အလုပ်ခွင်ဝင်နိုင်သလို တက္ကသိုလ်ဝင်ခွင့်ကိုလည်း လျှောက်နိုင်ပါသည်။ ကျွန်တော့်သားသည် ပိုလီ ကျောင်းသို့ သွားလိုသူဖြစ်သည်။ မိရိုးဖလာ လမ်းရိုးရိုးကိုသာကြိုက်သော ကျွန်တော်တို့က တက္ကသိုလ်ဝင်ခွင့်ရဘို့ ဂျူနီယာ ကောလိပ်ကိုသာ တက်စေချင်ကြသည်။ စာကခက်သည်။ စာမေးပွဲအောင်ဘို့မလွယ်ဘူးဆိုတာတွေကို ကျွန်တော်တို့ကလက် မခံ၊ ဂျူနီယာကောလိပ်ကိုသာတက်ရမည်ဟု သားကို ကျွန်တော်တို့ တိုက်တွန်းခဲ့ကြသည်။

သူ့အကို ကျွန်တော်တို့သားကြီးမှာ စင်္ကာပူအမျိုးသားတက္ကသိုလ်မှာ တက်နေပါပြီ။ ထိုကျောင်းသို့မတက်မီ သူက စစ်မှုထမ်း ရစဉ်က သူတို့စစ်သားတွေ ထရိန်နင်ပေးရာကျောင်းမှာ သူက ဆရာလုပ်ရဖူးသည်။ “ဒက်ဒီ ဂျူနီယာကောလိပ်အ သုတ် ဆိုရင် အုပ်ချုပ်ရတာလွယ်တယ် ပေါ်လီက ကျောင်းသားတွေက ခပ်ကြမ်းကြမ်း အုပ်ချုပ်ရတယ်” ဟု ပြောဖူးသည်။ “သားတို့ ကြည့်ရုံနဲ့ သူတို့လာတဲ့နေရာကို ခန့်မှန်းလို့ရတယ်” ဟုလည်း ပြောဘူးသည်။ ဟုတ်လေ မဟုတ်လေသည် မသိရ။ သားက ပြောသောကြောင့် ကျွန်တော်တို့သည် ဂျူနီယာကောလိပ်ကိုသာ သားအငယ်ကို တက်စေချင်ကြသည်။

ကျွန်တော့်သားငယ်သည် ကျွန်တော်တို့ကတွန်းသောကြောင့် ဂျူနီယာကောလိပ်သို့ ၀င်ခွင့်ရခဲ့ပါပြီ။ ကျောင်းကောင်စီ လူ ကြီး အရွေးခံရပါပြီ။ ကျွန်တော်တို့ ကျောင်းသားဘ၀ကမူ ကျွန်တော့်မှာ ခေါင်းဆောင်အရည်အချင်းမရှိ၍ ကျောင်းကောင်စီ လူကြီး မဖြစ်ခဲ့ပါဘူး။ အခု သားငယ် ၁၇ နှစ်သားက ကောင်စီလူကြီးဖြစ်နေပြီဆိုတော့ သားအတွက်  ဂုဏ်ယူမဆုံး၊ အလွန် ပိတိဖြစ်နေကြသောမိဘနှစ်ပါးသည် ဤတာဝန်ပေးအပ်ပွဲကို မလွှဲမသွေ တက်ရပါလိမ့်မည်။

ဂျူနီယာကောလိပ်မှာ ကောင်စီလူကြီး အရွေးခံရဖို့ကိစ္စမှာ မလွယ်ကူပါ။ စင်္ကာပူကျောင်းများမှာ အလယ်တန်းအဆင့်များ မှအစပြု၍ CCA ခေါ် (Co-Curricerlan Activing) မိမိဘာသာ ၀ါသနာပါရာလုပ်ရသော၊ ကျောင်းတွင် အပိုယူရသော အပို သင်ရိုးညွှန်းတမ်း သင်တန်းတွေရှိသည်။ စန္ဒယားအတီးသင်၊ ကျောင်းတီးဝိုင်း၊ ဘက်မင်တန်၊ ဘတ်စကက်ဘော စသည်ဖြင့် သင့်တော်ရာရာကို ဆရာကရွေးပေးလျှင်သော်လည်းကောင်း၊ မိမိက ၀ါသနာပါလျင်သော်လည်းကောင်း အဆိုပြုရွေးချယ်ရ သည်။ ယခုကျောင်းကောင်စီဆိုသည်မှာ အပိုသင်ရိုးညွှန်းတမ်းတွင် အပါအ၀င်တခုဖြစ်ပါသည်။ စီစီအေရမှတ်သည် သား၏ နောင်ရေးတက္ကသိုလ်ဝင်ခွင့်လျှောက်ရာတွင် အလွန်အရေးပါပါသည်။

ကျွန်တော့်သားမှာ မိဘအများသိကြသော၊ စိတ်ညစ်ကြရသော Computer Game တွေ ဆော့တတ်သူများတွင် အပါအ ၀င်ဖြစ်လေရာ Information Technology ခေါ် ကွန်ပျူတာသင်တန်းကိုသာ အထက်တန်းကျောင်းသားဘ၀က တလျှောက် လုံး ယူခဲ့သည်။ လူက၀ပြီး Over Weight ဖြစ်နေလေရာ အမေလုပ်သူက သား၏ စီစီအေကို ဘတ် (စ) ကတ်ဘော သို့ ပြောင်းပါရန် တယ်လီဖုန်းဖြင့် သား၏အတန်းပိုင်ဆရာများထံ အကြိမ်ကြိမ် ဆက်သွယ်ဆော်သြခဲ့ရဖူးသည်။ မိဘကတောင်း ဆိုသောကြောင့် ဘတ် (စ) ကတ်ဘောအသင်းဝင်ဖြစ်သွားရာ မူလအိုင်တီကလည်း ယူမြဲဖြစ်သောကြောင့် ကျွန်တော့်သား သည် စီစီအေ ၂ ခုယူပြီး အထက်တန်းကျောင်း ပြီးခဲ့ရသည်။

သူသည် ကျောင်းမှာပျော်သူဖြစ်သည်။ ကျောင်းက ၇း၂၀ မှာ စပြီးတက်ရာ အမြဲတစေ  ၆း ၄၅  ဆို သူကျောင်းသိုိ့ ရောက် နေပြီ။ စာသင်ခန်းကို ဦးစွာရောက်နေသောကြောင့် စာသင်ခမ်းသော့ကိုင် မော်နီတာဖြစ်လာခဲ့သည်။ ကျောင်းရက်ပျက် သည်မရှိ မိဘစကားကို နားထောင်ရန် ၀န်လေးသော်လည်း အတန်းဆရာက ပြောစကားများကိုမူ တသဝေမတိမ်းနားထောင် တတ်လေသည်။

ဂျူနီယာ ကောလိပ် မှာ ကျောင်းကောင်စီ စီစီအေအတွက် ကျောင်းသား ၆၀၀ ကျော်က အဆိုပြုလွှာတင်ကြလေသည်။ ထိုကျောင်းသား ၆၀၀ ကို မေးခွန်းအတိုလေးတွေ ဆယ်ခုလောက်မေးသည်။ ထိုမေးခွန်းများ၏ နောက်ဆုံးမေးခွန်းမှာ “ What is your core value? ”  ဟုဖြစ်သည်။

မေးခွန်း မှာ အဖြေ နှစ်မျိုးဖြစ်နိုင်သည်။ “သင့်တွင် အကောင်းဆုံးအရည်အချင်း ဘာတွေရှိသနည်း” ဟု ဖြစ်နိုင်သလို “သင် တန်ဖိုးအထားဆုံးအရာမှာ ဘာလဲ” ဟုလည်း ဖြစ်နိုင်ပါသည်။ မေးခွန်းသည် ဖီလိုဆိုဖါများအဖို့ စာမျက်နှာတွေ အများကြီး ရေးခါ ဖြေနိုင်သော အဖွင့်မေးခွန်းဖြစ်နေပါသည်။

ထိုမေးခွန်းများ၏ အဖြေကို ကြည့်ခါ ဆရာတွေက လူ ၁၅၀ ထိရွေးချယ်လိုက်လေသည်။ ထိုမေးခွန်းတွေကို  သားဖြစ်သူက ဘယ်လိုဖြေလိုက်သည်မသိ၊ လူ ၁၅၀ တွင် သားပါလာသည်။ ထိုလူတို့ကို အုပ်စုဖွဲ့ကာ Group Test  အနေဖြင့် ပြဿနာလေး တွေ ဖြေရှင်းခိုင်းကာ ဆရာတို့က ကျောင်းသားတွေကို အကဲခတ်ကြလေသည်။

သားပြောပြသောပြဿနာတခုတွင် ကျောင်းသား ၅ဦးစီကို ၂ အုပ်စုခွဲကာ အခန်း ၂ ခုတွင်ခွဲထားသည်။ သူတို့ သည် စက္ကူ ကဒ်များဖြင့်လုပ်သော တံတားရှည် ၂ ခုကို တည်ဆောက်ရခါ တဖက်နှင့်တဖက် အချိန်အကန့်အသတ်နှင့် တဦးစီ ကိုယ်စား လှယ်လွှတ်ကာ တံတားပုံစံကိုတည်ဆောက်နေကြသည်။ တံတားနှစ်ခု ပုံစံကျကျဆက်နိုင်ရေးမှာ ကိုယ်စားလှယ်လွှတ် လိုက်သူနှစ်ဦး၏ ဆက်သွယ်ရှင်းပြနိုင်ခြင်း အရည်အချင်းပေါ်တွင် မူတည်လေသည်။ အချိန်စေ့သော် တံတားပုံစံနှစ်ခုကို ယူကာ တနေရာထဲတွင် တံတားကြီးတခုဖြစ်အောင် တည်ဆောက်ကြရသည်ဟု ဆိုသည်။ မြန်မာပြည် ဗိုလ်သင်တန်းကျောင်း သားရွေးပွဲတွေမှာလည်း ထိုကဲ့သို့ပြဿနာပုစ္ဆာတွေကို မေးသည်ထင်ပါသည်။

ထို Group Test  မှလွန်သော် လူ ၅၀ ခန့် ကျန်သည်။ ထိုလူငါးဆယ်သည် စင်မြင့်ပေါ်သို့တက်ခါ အောက်က ဒိုင်တွေမေးသော မေးခွန်းကို နားလည်သလို ဖြေရသည်ဟုဆိုသည်။

အင်္ဂလိပ်စကားနှင့် တရုတ်စကားကို အလုပ်ဖြစ်ရုံ ဆက်သွယ်ပြောတတ်ရှာသော ကျွန်တော့်သား စင်မြင့်ပေါ်မှာ ဘာတွေ ပြော၊ ဘာတွေဖြေလိုက်သည်မသိ ကောင်စီလူကြီးကား အရွေးခံရပေပြီ။ စိစစ်ရေုး စာမေးပွဲတွေကို အောင်ခဲ့ပါပြီ။ နောက်ဆုံး ကောင်စီလူကြီး ၃၇ ဦးကို ရွေးချယ်ရာတွင် ပါဝင်လာခဲ့သည်။ သားငယ်သည် ကျောင်းကောင်စီ၏ “ဆက်သွယ်ရေးကော်မီ တီ” ၀င်တဦးဖြစ်လာခဲ့သည်။

(၂)
ကျွန်တော်တို့ကိုပေးလိုက်သော ဆေးရောင်စုံတွေနှင့်ဖိတ်စာသည် VIP ဖိတ်စာဖြစ်ပုံရသည်။ ဖိတ်စာကဒ်ကို ထုတ်ပြသည် နှင့် ကြိုဆိုရေးအဖွဲ့က ကျောင်းသားတယောက်က ကျွန်တော်တို့ကို အခမ်းအနားကျင်းပရာ ခန်းမထဲသို့ အရောက်လိုက်ပို့ပါ သည်။ ရှေ့ဆုံးတန်းမှာ ကျွန်တော်တို့ နေရာချပေးသည်။

အခမ်းအနားစသည်နှင့် “God Save The King” ကဲ့သို့ သောစစ်ချီတီးလုံးနှင့် ကောင်စီလူကြီးတွေ တဖွဲ့စီ ၀င်လာကြပါသည်။ ပရိတ်သတ်က ညီညာဖျဖျ လက်ခုတ်တီးကြိုဆိုကြသည်။ ကျွန်တော့်ရင်ထဲမှာ လူအုပ်ထဲက  မားမားကြီးလျှောက်လာသော အနောက်တိုင်းဝတ်စုံပြည့်ဖြင့် သားကြီးကိုကြည့်ကာ ကြည်နူးမှု အပြည့်ဖြစ်နေမိသည်။ အမေလုပ်သူကိုကြည့်လိုက်တော့ မျက်ရည်တွေစီးကျနေကာ ပြုံးပြုံးကြီးဖြစ်နေလေသည်။
သားသည် တာဝန်ယူတတ်သည့် ကောင်စီလူကြီးဖြစ်နေပေပြီ။ အခမ်းအနားက အလွန်ရိုးရှင်းပါသည်။ ၃၄ ကြိမ်မြောက် ကောင်စီလူကြီးများက ၃၅ ကြိမ်မြောက်ကောင်စီလူကြီးများကို တာဝန်လွှဲအပ်ပွဲဖြစ်ပါသည်။ ဒုတိယကျောင်းအုပ်ကြီးက စကားပြောသည်။ ကောင်စီဥက္ကဌဟောင်းနှင့် ဥက္ကဌအသစ်တို့ စကားပြောကြသည်။ အခမ်းအနားမှူးလုပ်သူကလည်း မိန်း ကလေး နှစ်ယောက် မိုက်ခွက်ကို တဦးစီ တချိန်စီ တာဝန်ယူပြီး အခမ်းအနားကျင်းပသွားပုံမှာ သေသပ်ပိရိလှပါသည်။စင်္ကာပူ တကျွန်းလုံး ဂျူနိယာကောလိပ်များမှ ကျောင်းကောင်စီကိုယ်စားလှယ်တွေကိုလည်း ဖိတ်ထားသည်ကို တွေ့ရသည်။ ကျောင်းယူနီဖေါင်း တံဆိပ်အမျိုးမျိုးဖြင့် လူငယ်လေးတွေကို ကြည့်ရသည်မှာ အားရစရာကောင်းသည်။ သူတို့သည်  အခုလို ပွဲတွေမှာ တဦး နှင့်တဦး တွေ့ဆုံကာ အတွေ့အကြုံတွေ ဖလှယ်ကြပါလိမ့်မည်၊ သူတို့ကလေးတွေသည် တချိန်တွင် စင်္ကာပူ နိုင်ငံကို ဦးဆောင်ကြပါလိမ့်မည်။ သူတို့သည် အနာဂါတ်၏ခေါင်းဆောင် ကလေးများဖြစ်ကြပါသည်။

(၃)
ကျွန်တော်တို့ မရိပ်စားမိလျှင် ရှိစေ၊ ခေတ်ကြီးကပြောင်းနေပါပြီ IT – Information Technology နှင့်အတူ  Network  တွေ Social Media တွေနှင့် တိုးတက်သော ပို၍လွတ်လပ်သော မြို့တော်ကြီးများ၊ နိုင်ငံရပ်ခြားမှာ  လူတို့၏ယဉ်ကျေးမှုပုံစံသည် တိုးတက်ပြောင်းလဲနေသော အချိန်ဖြစ်ပါသည်။ ဟောင်းနွမ်းအိုမင်းသော လူနေမှုစနစ်သည် အဆုံးသတ်ခါ အသစ်တက် လာသော ခေတ်လူငယ်တို့၏ ယဉ်ကျေးမှုဆက်ဆံရေးပုံစံသည် အစားထိုး၍၀င်ရောက်လာတော့မည်မှာ သေချာပါသည်။

ခေတ်သစ်ကို အရင်ဆုံး တွေ့ထိကြိုဆို၊ အသစ်တွေကိုဖန်တီးကြမည့်သူများမှာ လူငယ်တို့ဖြစ်ပါသည်။ ယနေ့တိုင်းပြည်၏ ကံကြမ္မာကို ဆုံးဖြတ်နေသူများသည် ထိုလူငယ်တို့၏အင်အားကို အသုံးချရန်လိုအပ်ပြီး တိုးတက်လာသောလူငယ်များကို နေရာမပေးဘူးဟုဆိုလျှင် အသွင်ကူးပြောင်းရေးအချိန်သည် အဖုအထစ် အန္တရာယ်တွေ များပြားမှာသေချာပါသည်။

ထို့ကြောင့် နိုင်ငံတော်၏ အနာဂါတ်ကို တာဝန်ယူကြရမည့် ယနေ့ကလေးငယ်များအဖို့ နိုင်ငံတော်၏ ရေးရာကိစ္စ များနှင့် ပတ်သက်၍ အပြုသဘောမြင်နိုင်ကြရန် အရေးကြီးပါသည်။ ထိုလူငယ်များ၏အသံကို နားထောင်ရန်  ထိုလူငယ်ကလေးများ ကိုနေရာပေးရန် တာဝန်မှာ ယနေ့လူကြီးတွေ၏တာဝန်ဖြစ်ပါသည်။

တရုတ်ပြည်ကြီး၏ ကျောင်းသားလှုပ်ရှားမှုများကိုလည်းကောင်း၊ ဟောင်ကောင်မှ ဒီမိုကရေစီ ရေးတောင်းဆိုနေကြသော   လူငယ်ထု၏ဆန္ဒကိုလည်းကောင်း၊ ကမ္ဘာက အထင်အရှား တွေ့မြင်ကြပြီးဖြစ်ပါသည်။ မြန်မာနိုင်ငံလွတ်လပ်ရေးကို ဦး ဆောင်တောင်းဆိုခဲ့ကြသည့် ကိုနုတို့ ကိုအောင်ဆန်းတို့မှာလည်း သူတို့တော်လှန်ရေးဘ၀သဘောတရားများကို တက္ကသိုလ် တက်သည့်လူငယ်ဘ၀မှာပင် သူတို့ရင်ထဲ၌ အစပျိုးခဲ့ကြခြင်းဖြစ်ပါသည်။ ယနေ့လူငယ်တွေမှာ နိုင်ငံ၏  ကောင်းရာကောင်း ကြောင်းကို မတွေးတော၊ မပါဝင်ရဘူးဆိုလျှင် ကျွန်တော်တို့မှာ အနာဂါတ်မရှိတာနှင့်အတူ တူပင်ဖြစ်ပါသည်။

ကျွန်တော်တို့ နိုင်ငံတွင် စစ်တပ်၏လွှမ်းမိုးအုပ်ချုပ်မှုကြောင့် စစ်တပ်လူတန်းစားနှင့် စစ်တပ်မဟုတ်သော သာမန် လူတန်း စားဟူ၍ ကွဲပြားလျက်ရှိပါသည်။ တာဝန်ရှိသောနေရာ၊ သြဇာအာဏာရှိသောနေရာတိုင်းတွင်  စစ်တပ်မှပုဂ္ဂိုလ်များကိုသာ နေရာပေးထားခြင်းဖြင့် တိုင်းပြည်ကိုချစ်သည်ဟူသော အယူအဆ၀ါဒတွင် ကွဲပြားချက်များရှိနေပါသည်။

နိုင်ငံတော် အစိုးရအနေဖြင့် ထိုကွဲလွဲနေမှုကို ပြုပြင်ရန်လိုပါသည်။ စစ်သား၊ စစ်ဗိုလ်မဟုတ်သည်နှင့် တိုင်းပြည်ထူထောင်ရေး၊ ပြုပြင်ရေးလုပ်ငန်းများတွင် ပါဝင်ရန်မလိုဟုသော အယူအဆမှာ အလွန်မဆီလျော်သောကိစ္စဖြစ်ပါသည်။

တိုင်းပြည် နိုင်ငံဟူ၍ဖြစ်လာသည်နှင့် (Diversify) အမျိုးအမည် ကွဲပြားသောလူမျိုး၊ အယူအဆ၊ မတူညီသော   လူတန်းစားတို့ သည် ရှိကြစမြဲဖြစ်ပါသည်။ ကျွန်တော်တို့ မြန်မာနိုင်ငံသားတိုင်း တန်ဘိုးထားရမည့် (Core Value) ဆိုသည်မှာလည်း မိမိတို့ ယဉ်ကျေးမှု အစဉ်အလာထိမ်းသိမ်းရေးနှင့် တိုင်းပြည်တိုးတက် သာယာဝပြောရေးအတွက် အလုပ်လုပ်လိူစိတ်ရှိရေးတို့ပင် ဖြစ်ပါသည်။

“တရားမျှတ လွပ်လပ်ခြင်း”  ဟုဆိုအပ်သော နိုင်ငံတော်သီချင်းတွင်ပါသည့် လောကပါလတရားမှာကျွန်တော်တို့နိုင်ငံတွင် မရှိမဖြစ် လိုအပ်ပါသည်။

(၄)
ကျွန်တော်သည် ကျွန်တော့်သားငယ်၏ ကျောင်းကောင်စီတာဝန်ပေးအပ်ပွဲမှ များစွာသောစဉ်းစားစရာများနှင့် ပြန်လာခဲ့မိပါ သည်။ ၁၉၉၂ ခုနှစ် ကျွန်တော်စင်္ကာပူသို့ရောက်စကထိုစဉ် က၀န်ကြီးချုပ်ဖြစ်သူ ဂိုချောက်တောင်းက လူငယ်တွေကို အစိုးရ နှင့် လက်တွဲအလုပ်လုပ်ကြဘို့ ဖိတ်ခေါ်သံကို ကြားလိုက်ရဘူးပါသည်။ ယနေ့ ကျွန်တော်တွေ့ခဲ့ရသော ကျောင်း ကောင်စီ လူကြီးတွေကို စုစည်းမြေတောင်မြှောက်ပေးခြင်းမှာ အစိုးရက အစီစဉ်တကျချပေးသောစီမံချက်ဖြစ်သည်ဟု ကျွန်တော် ယုံကြည်ပါသည်။

ကျွန်တော်တို့ ယနေ့တွေ့ကြုံနေရသော မြန်မာနိုင်ငံမှအခြေအနေများကို စဉ်းစားကြည့်နေမိပါသည်။ အဆက်အသွယ် ကောင်းသူများက မိဘများဖန်တီးပေးသော ၀င်ငွေကောင်းသည့် လုပ်ငန်းကြီးများတွင် နေရာယူ ငွေဖန်တီးနိုင်သူများရှိသလို မပြည့်မစုံဖြင့် ပညာကို ကြိုးစားရှာဖွေနေသူများ၊ လုပ်စရာ ကိုင်စရာ အတည်အကျမရှိ လေလွင့်နေသူများ၊ ဆေးစွဲပြီးလမ်းမှား ရောက်နေသူများ၊ ကာရာအိုကေ၊ စားသောက်ဆိုင်၊ ဖြေဖျော်ရေးဆိုင်များတွင်ဖြစ်သလို ကုပ်ကပ်ငွေရှာနေကြရသူများ၊ ဟန်း ဖုံးတလုံးဖြင့် အချိန်ဖြုန်းတီးနေသူများ၊ လ္ဘက်ရည်ဆိုင်ထိုင် လေကန်နေသူများ စသည်ဖြင့် တွေ့နေကြရပါသည်။  တိုင်းပြည် ထူထောင်ရေးလုပ်ငန်းများတွင် အလုပ်လုပ်နိုင်သူက ရာနှုန်း နည်းလွန်းလှပါသည်။

မည်သို့ဆိုစေ ကျောင်းသားအရွယ်လူငယ်များမှာ စာသင်ခန်းအတွင်း ဆရာသင်ကြားပို့ချသည်ကို လေးစားစွာ နာယူသင် ကြားနေကြသည်ကိုသာ တွေ့မြင်လိုလှပါသည်။ အထွေထွေ ပုစ္ဆာရပ်တွေကို ဖြေရှင်းနေကြသည်ကိုသာ တွေ့မြင်လိုပါသည်။ တိုင်းပြည်၏အခြေအနေ အနာဂါတ်အပေါ် မကောင်းမြင်နေသောကလေးတွေ မဖြစ်စေချင်ပါ။

ကျွန်တော်တို့ မြန်မာနိုင်ငံတွင်လည်း လူငယ်များကို မြေထောင်မြှောက်ပေးရပါလိမ့်မည်။ ထိုသို့မဟုတ်မူ ယနေ့ ကျောင်း သားထု၏ လွတ်လပ်သောအမြင် အယူအဆတို့နှိပ်ကွပ်ရန်ကြိုးစားနေမည်ဆိုလျှင် မိမိကိုယ်ကို အန္တရာယ်ဖြစ်အောင် ဒုက္ခ ပေးနေခြင်းသာဖြစ်သည်ဟု ကျွန်တော်ယူဆပါသည်။

ကိုသန်းလွင်

ကာတွန်း လိုင်လုဏ် - ကြိုဆိုနေသူတွေ

 
ကာတွန်း လိုင်လုဏ် - ကြိုဆိုနေသူတွေ
မေ ၂၇၊ ၂၀၁၅

1MB ကို ၆ ကျပ် ပဲကောက်ခံမည့် အူရီဒူး ရဲ့ “ ဖလန်းဖလန်းအင်တာနက်”

 1MB ကို  ၆ ကျပ် ပဲကောက်ခံမည့် အူရီဒူး ရဲ့  “ ဖလန်းဖလန်းအင်တာနက်”
ရန်နောင်( ဗိုလ်တထောင်)  မိုးမခ  မေ ၂၇ ၂၀၁၅




                အူရီဒူးမြန်မာရဲ့ သုံးသလောက်သာကျသင့်မည့် “ ဖလန်းဖလန်းအင်တာနက်”  အစီအစဉ်သစ် မိတ်ဆက်ပွဲကို ရန်ကုန်မြို့ ဆူးလေရှန်ဂရီလာဟိုတယ်တွင် မေလ ၂၆  ရက်နေ့ နံနက်(၁၀) နာရီ၌ ကျင်းပပြုလုပ်ခဲ့သည်။
                   ဤသုံးသလောက်သာ ကျသင့်မည့် အင်တာနက် အစီအစဉ်ကို  ၂၀၁၅ခုနှစ် မေလ (၂၇) ရက်နေ့ (၀၀း၀၀း၀၁) နာရီမှစတင်၍  1MB လျှင် ၆ကျပ် နှူန်းဖြင့် အထူးနှူန်းထားသစ်ကို မိတ်ဆက်လိုက်သည်။ ၂၀၁၅ ခုနှစ် မေလ ၂၇ ရက် ၀၀း၀၀း၀၁ နာရီ မှစတင်၍ ကျသင့်သလောက်ပေး အစီအစဉ်မဟုတ်သော မည်သည့် အင်တာနက် အစီအစဉ်ကိုမဆို ဝယ်ယူသူတိုင်းသည် ၁၀၀% အပိုထပ်ဆောင်း လက်ဆောင်ရရှိမှာ ဖြစ်သည်။ အသုံးပြုနိုင်သော သက်တမ်းကာလများမှာ ယခင်အတိုင်းဖြစ်ပါသည်။
          “ ဥရောပနိုင်ငံတချို့နဲ့ အရှေ့တောင်အာရှနိုင်ငံတချို့မှာတောင်မရသေးတဲ့ ကျွန်တော်တို့ရဲ့ နောက်ဆုံးပေါ်ကမ္ဘာ့အဆင့်မီ အင်တာနက်ကို ဈေးသက်သက်သာသာနဲ့ သုံးဖို့ ဒီအစီအစဉ်တွေကို တီထွင်ပြီး သုံးစွဲသူမိဘပြည်သူတွေလက်ထဲ အရောက်ထည့်ပေးခြင်းဖြစ်ပါတယ် ” ဟု အူရီဒူးမြန်မာ၏ အမှုဆောင်အရာရှိချုပ် Ross Cormack  ကပြောပြခဲ့သည်။
          အားလုံးအတွက် မြန်ဆန်သော အင်တာနက် နှင့် ကြည်လင်ပြတ်သားသော အသံတို့ကို ယူဆောင်လာပေးသည့် အူရီဒူး မြန်မာသည် လူနေမှု ဘဝများ တိုးတက် ကောင်းမွန်စေမည့် ဝန်ဆောင်မှုများကို ၂၀၁၄ ဩဂုတ်လတွင် စတင်ပေးအပ်ခဲ့သည်။ ၂၁၀၃ ဇွန်လတွင် ဆက်သွယ်ရေး လိုင်စင်ရရှိပြီးနောက် တစ်နှစ်တာကာလအတွင်း အူရီဒူး သည် မြန်မာတို့၏ နေ့စဉ်ဘဝများတွင် အရေးပါသော အစိတ်အပိုင်းတစ်ရပ်အဖြစ် ပါဝင်ခွင့်ရနိုင်ရန် အခြေခံ အုတ်မြစ်ချလုပ်ငန်းများကို ဆောင်ရွက်နေခဲ့သည်။ အူရီဒူးမြန်မာ၏ ဝန်ဆောင်မှုများသည် မျိုးဆက်သစ် 3G ကွန်ရက်ကို အသုံးပြုထားသဖြင့် မြန်မာတို့၏ လူနေမှုဘဝများ တိုးတက်ကောင်းမွန်စေမည့်အပြင် စိတ်လှုပ်ရှားဖွယ်ရာ များပြည့်နှက်နေသော သုံးစွဲရလွယ်ကူသည့် ဆက်သွယ်ရေးစနစ်ဖြစ်ပါသည်။ အူရီဒူးမြန်မာတွင် အလုပ်အကိုင် အခွင့်အလမ်းများစွာရှိပါသည်။ တက်ကြွ ပျော်ရွှင်ဖွယ် အဖွဲ့အစည်း နှင့်ပူးပေါင်းလိုပါက recruitme@myanmar.ooredoo.com သို့ CV ပို့နိုင်ကြောင်း လည်း မသီရိကြာညိုက ပြောပြခဲ့သည်။

                   

HTC One M9 မိတ်ဆက်ပွဲ ကျင်းပပြုလုပ်

HTC One M9  မိတ်ဆက်ပွဲ ကျင်းပပြုလုပ်
ရန်နောင် (ဗိုလ်တထောင်) မိုးမခ မေ ၂၇ ၂၀၁၅
                                             ထရီဇာ
                                            ဦးကျော်သူအောင်

                                               မေမြတ်နိုး
                                              ရဲရင့်အောင်

            မိုဘိုင်းတီထွင်နည်းးပညာနှင့် ဒီဇိုင်းလောကတွင် ဦးဆောင်နေသော HTC Corporation က စတိုင်ကျလှပသော HTC One M9 စမတ်ဖုန်းမိတ်ဆက်ပွဲကို မေလ ၂၆ ရက်နေ့ နေ့လည် (၂) နာရီတွင် ရန်ကုန်မြို့ ဆူးလေရှန်ဂရီလာဟိုတယ် ၌ ကျင်းပပြုလုပ်ခဲ့သည်။

            HTC One M9 စမတ်ဖုန်းနှင့် ပတ်သက်၍  ကိုကျော်သူအောင်( Head of Business Development of HTC Myanmar) မှ ရှင်းလင်းပြောကြားရာတွင်  “ ကြည်လင်ပြတ်သားသော ဓာတ်ပုံများအတွက် Sapphire Glass ဖြင့်ဖုံးအုပ်ထားသော 20MP ကင်မရာ၊ သုံးစွဲသူများအတွက် ပြည့်စုံကောင်းမွန်သော Surrond Dolby Audio System ပါရှိသည့် စပီကာ မျက်နှာပြင်ရှေ့တွင် လှပစွာတပ်ဆင်ထားကြောင်း၊ Wallpaper, icon နှင့် မြောက်များစွာသော အရာများကို သုံးစွဲသူ၏ စိတ်တိုင်းကျ ပြောင်းလဲ အသုံးပြုနိုင်အောင် THEME app ကို လည်း ထည့်သွင်းပေးထားကြောင်း၊ ဖုန်း၏ ကိုယ်ထည်တစ်ခုလုံးကို သတ္တုဖြင့် ပြုလုပ်ထားကာ သုံးစွဲသူကိုင်ဆောင်ရလွယ်ကူစေရန် ဘေးပတ်လည်တွင် သတ္တုဘောင်ကို ဖုန်းနှင့်တသားတည်းကျအောင် တပ်ဆင်ထားကြောင်း  ” ရှင်းလင်းပြောကြားခဲ့သည်။

            အဓိကက အခုမိတ်ဆက်လိုက်တဲ့ HTC One M9 က ကင်မရာအရမ်းကောင်းပါတယ်။ ကင်မရာက  20MP ရှိတဲ့အတွက် ကင်မရရာကြီးများနဲ့ တန်းတူ ရိုက်နိုင်ပါတယ်။ Selffie  ရိုက်မယ်ဆို တခြားဖုန်းတွေထက်သာလွန်တဲ့  ပုံထွက်ကိုရနိုင်ပါတယ်ဟုလည်း ထပ်မံပြောပြခဲ့သည်။


မြန်မာနိုင်ငံရုပ်ရှင်အစည်းအရုံး သရုပ်ဆောင်သင်တန်းဖွင့်ပွဲ ပြုလုပ်

 မြန်မာနိုင်ငံရုပ်ရှင်အစည်းအရုံး သရုပ်ဆောင်သင်တန်းဖွင့်ပွဲ ပြုလုပ်
ရန်နောင်(ဗိုလ်တထောင်) မိုးမခ  မေ ၂၇ ၂၀၁၅
                         အကယ်ဒမီအောင်ခိုင်
                      စည်သူဗိုလ်ကလေးတင့်အောင်

                           အကယ်ဒမီလူမင်း

                         ဦးခင်မောင်ချင်း
                           ဦးနှင်းမိုး


            မြန်မာနိုင်ငံရုပ်ရှင်အစည်းအုံးမှ (၁/၂၀၁၅) သရုပ်ဆောင်သင်တန်းဖွင့်ပွဲ ကို အစည်းအရုံးတည်ရှိရာ ရန်ကုန်မြို့ ဗဟန်းမြို့နယ် ဝင်္ကပါလမ်း အမှတ်(၁၀) တွင် မေလ ၂၄ ရက်နေ့က ကျင်းပပြုလုပ်ခဲ့သည်။

            အခမ်းအနားမှူး အဖြစ် အကယ်ဒမီအောင်ခိုင်မှ ဆောင်ရွက်ခဲ့ပြီး  ရှေးဦးစွာ အစည်းအရုံးနာယက စည်သူဗိုလ်ကလေးတင့်အောင်မှ အမှာစကားပြောကြားခဲ့သည်။ ထို့နောက် ဥက္ကဋ္ဌ ဦးလူမင်း မှ အဖွင့်မိန့်ခွန်းပြောကြားခဲ့သည်။ (၁/ ၂၀၁၅) သရုပ်ဆောင်သင်တန်းကြီးကြပ်မှု နှင့် သင်ကြားလေ့ကျင့်ရေးကော်မတီ အတွင်းရေးမှူး ဦးခင်မောင်ချင်းမှ သရုပ်ဆောင်သင်တန်း ဖွင့်လှစ်ရခြင်း ကိစ္စအားတင်ပြကာ နာယက ဦးနှင်းမိုးမှ နိဂုံးချုပ်အမှာစကားပြောကြားပြီး အခမ်းအနားကို ရုပ်သိမ်းခဲ့သည်။


            ယခုနှစ် သရုပ်ဆောင်သင်တန်းတွင် သင်တန်းသား (၉၀) တက်ရောက်ပြီး သင်တန်းကာလမှာ သုံးလကြာမြင့်မည်ဖြစ်သည်။သင်တန်းကြေးမှာ တလလျှင် တသိန်းကျပ်ဖြစ်သည်။ 

အဆိုပါရုပ်ရှင်အစည်းအရုံး သရုပ်ဆောင်သင်တန်းမှ ကျော်ဟိန်း၊ မေသန်းနု၊ ဇင်ဝိုင်း ကဲ့သို့သော နာမည်ကြီးသရုပ်ဆောင်များပေါ်ထွက်ခဲ့သည်။

မောင်တူး - သက်ရှိပန်းချီ - အပိုင်း (၁၇)


မောင်တူး - သက်ရှိပန်းချီ  - အပိုင်း (၁၇)
(မိုးမခ) မေ၂၆၊ ၂၀၁၅ 
• ခွပ်ဒေါင်း ရဲဘော် ကျောင်းသားအိုကြီးတယောက်အကြောင်း
ဒီမိုကရေစီ ပညာရေး သပိတ်စတင်တဲ့ ၂၀၁၅ ခုနှစ် ဇန်န၀ါရီ ၂၀ ကစလို့ ခရီးရှည် လမ်းလျောက် ကျောင်းသားတွေထဲမှာ ကျောင်းသားမဟုတ်သူတွေ ပါနေတယ်လို့တိုးတိုးတမျိုး၊ ကျယ်ကျယ်တဖုံ အသံတွေထွက်လာတယ်။ အောင်မှိုင်းဆန်းက ကျောင်းသားမဟုတ်ဘူး ဆိုတာလည်း ပြောကြရဲ့။ နန္ဒစစ်အောင်က ကျောင်းသားမဖြစ်နိုင်ဘူးလို့လဲ ဆိုပြန်တယ်။ အဝေးသင်တွေ အပြင်ဖြေတွေက ကျောင်းသားမဟုတ်ပြန်ဘူးလို့လဲ ကြားရပြန်တယ်။ ရှစ်လေးလုံး အရေးတော်ပုံကစ ဖွဲ့စည်းလာတဲ့  ကျောင်းသားတပ်မတော်မှာတော့ ကျောင်းသားစိတ်ဓါတ် ရှိသူအားလုံးကို ကျောင်းသားတပ်မတော်သား(တပ်ဖွဲ့ဝင်) အဖြစ် လက်ခံထားခဲ့ပါတယ်။ ဒါကြောင့်လည်း ကျောင်းသားတပ်မှာ ဆရာဝန်၊ အင်ဂျင်နီယာ၊ လယ်သမား၊ အလုပ်သမားနဲ့ ကျောင်းဆရာ တွေပါဝင်ခဲ့တယ်။ ဒီနေ့မှာတော့ ကျောင်းသားလည်း ဖြစ်ခဲ့ အလုပ်သမားလည်း လုပ်ခဲ့ ကျောင်းဆရာလည်း ဖြစ်ခဲ့သူ တယောက်အကြောင်း ကွယ်လွန်ချိန်တိုင်အောင် ကျောင်းသားတပ်မတော်သားအိုကြီးဘ၀နဲ့ နေသွားခဲ့သူ အကြောင်း သတိရနေပါတယ်။

သူနဲ့ကျနော်စတွေ့ချိန်မှာ သူက မျှစ်တွေချိုးပြီး ယူလာတယ်။။ ကျနော်တို့ ကျောင်းသားတပ်မတော် ခံစစ်စခန်းကုန်းပေါ် တက်လာတာ မှတ်မိနေသေးတယ်။ ၁၉၉၁ ခုနှစ်ကုန်ပိုင်း လွန်ခဲ့တဲ့ နှစ် အစိတ်လောက်ကပေါ့။  ကျနော်တို့က မာနယ်ပလောခံစစ်။ န၀တ စစ်အစိုးရဖက်က မာနယ်ပလောထိုးစစ်။ မိုးဦး ဘီလူး တဒိန်းဒိန်း တဒိုင်းဒိုင်းနဲ့ စစ်ခင်းနေချိန် ကျနော့်ကိုတွေ့တော့ သူက မေးလိုက်တယ်။ ပဲခူးက မောင်တူး ဆိုတာ မင်းလားတဲ့။ ကျနော် သုံးခွကပါ။ ပဲခူး၊ က၀ဆိုတာကတော့ အမေ အဖေ ဇာတိပါလို့ ပြန်ပြောလိုက်တော့ သူက ကိုယ့်မိဘတွေလည်း က၀ ဇာတိဘဲလို့ ပြုံးပြီးပြောတယ်။ ကိုယ့်နယ်သားချင်း ကျောင်းသားတပ်မတော်မှာ လာဆုံတော့ တွေ့ချင်လို့  ပါတဲ့။ ဒါက သူနဲ့ကျနော် စတွေ့ခဲ့ပုံ။ တောင်ပေါ်တက်လာတဲ့လမ်းတလျောက် ၀ါးတောက  ချိုးယူလာတဲ့ မျှစ်တွေကို သူက ဒါးနဲ့အစိပ်ကလေးတွေ ဖြစ်အောင် လှီးတယ်။ ပြီးတော့ နူးအောင်ပြုတ်။ ဆန်ကိုရေစိမ် ထောင်းထည့်။ မျှင်ငါးပိ၊ ဆား၊ ဟင်းချိုမှုန့််၊ ဆူးပုတ်ရွက်၊ ကြက်သွန်နဲ့ နနွင်းခတ်လိုက်တော့ မျှစ်တာလပေါဟင်း ဖြစ်သွားတယ်။ ကျနော်တို့ အတူစားကြတယ်။ သူဟာ ကျနော့ဆီ ဧည့်သည်လာလုပ်ရင်းကတောင် မျှစ်တာလပေါဟင်း ချက်ကျွေးသွား သလို နောက်ပိုင်း နှစ်တော်တော်များများ ကြာအောင် ကျနော်တို့ မကြာခန ဟင်းအတူတူ ချက်စားခဲ့ကြ ဖူးတယ်။ သူက ကျနော်ထက် အသက်ကြီးတယ်။ ABSDF ကျောင်းသားတပ်ဦးရဲ့ ဗဟိုကော်မတီဝင်လည်း ဖြစ်တယ်။ သူက ဗဟိုရုံးမှာ ကျနော်က ပြန်ကြားရေးဌာနမှာ ဒေါင်းဂွင်ဧရိယာမှာ အတူနေခဲ့ကြတယ်။ သူဟာ အပင်ပမ်းခံနိုင်တယ်။ အလုပ်ကြမ်းတွေလည်း လုပ်တယ်။ အလုပ် အတူတူ လုပ်ချိန်ဆို သူက ပိုလုပ်တယ်။ အနစ်နာခံတယ်။ သူနေမကောင်းရင် တခြားရဲဘော်တွေ မသိစေရဘူး။ တခြားသူတွေ ဖျားနာနေရင်သူ ရောက်လာတယ်။ လူနာမေးတယ်။ ပြုစုတယ်။ ကျနော်ငှက်ဖျားဖြစ်တိုင်း သူလာပြုစုတတ်တယ်။ သူနေမကောင်း ဖြစ်ချိန်တိုင်း ကျနော်မသိတာများတယ်။  ခရီးကြမ်းတွေလည်းနှင်တယ်။ တခါတလေ စကားတွေ ဒေါသနဲ့ ကြမ်းကြမ်းပြောသလို စစ်ပွဲတွေကိုလည်း ၀င်တိုက်တတ်တယ်။ သူကတော့ ကွယ်လွန်သွားပြီ ဖြစ်တဲ့ ကိုတိတ် (ခွပ်ဒေါင်းကျောင်းသားအိုကြီး ဦးမောင်မောင်တိတ်) ဖြစ်ပါတယ်။ ဒီနေ့မှာ သူ့အကြောင်း ပြောနေရတာကတော့ မေလ ၂၃ ရက်ဟာ သူမွေးနေ့ ဖြစ်နေလို့ပါ။

၂၀၁၅ ခုနှစ် မေလ ၂၃ ရက်မှာ ဒေါင်းအိုးဝေကို ကျနော် ဖတ်တယ်။ အရင်ကတော့ ဒေါင်းအိုးဝေ စာစောင်ပါ။ အခုတော့ ဒေါင်းအိုးဝေ မဂ္ဂဇင်း ဖြစ်နေပါပြီ။ မြန်မာနိုင်ငံလုံးဆိုင်ရာ ကျောင်းသားများ ဒီမို ကရက်တစ်တပ်ဦး (မကဒတ)All Burma Students’ Democratic Front (ABSDF)  ကျောင်းသားတပ်မတော် ကို စတင် တည်ထောင်တဲ့ ၁၉၈၈ ခုနှစ်ကတည်းက ဒေါင်းအိုးဝေစာစောင် စထုတ်ခဲ့ပါတယ်။ ကျနော်တို့ ကျောပိုးအိတ်တွေထည်းမှာ ဒေါင်းအိုးဝေ အမြဲပါတယ်။ မနှစ်က ငွေရတုဒေါင်းအိုးဝေ ထုတ်တယ်။ ဒီနှစ်တော့ ၂၆ နှစ်မြောက် အထူးထုတ်ကို ဖတ်နေတုန်း ၀မ်းနည်းမှတ်တမ်းနေရာမှာ ရောက်တော့ - ( ရဲဘော်မောင်မောင်တိတ် (၁၉၅၀- ၂၀၁၄) ကိုယ်ရေးအထ္ထုပ္ပတ္တိ။ ။ မြန်မာနိုင်ငံလုံးဆိုင်ရာ ကျောင်းသားများ ဒီမို ကရက်တစ်တပ်ဦး(ကျောင်းသားတပ်မတော်)တပ်ဖွဲ့ဝင် ရဲဘော်မောင်မောင်တိတ် (ကပ/၄၄၉၂)ကို အဖဦးရိုးထွန်း၊ အမိဒေါ်သိန်းညွန့်တို့မှ ၁၉၅၀ ခုနှစ် မေလ ၂၃ ရက်နေ့တွင် ပဲခူးတိုင်း၊ က၀မြို့နယ်၊ မမောက်ကျေးရွာ၌ မွေးဖွားခဲ့သည်။ ) ဆိုတာ ဖတ်မိတော့မှ သူ့မွေးနေ့ဟာ ဒီနေ့ မေ ၂၃ ဆိုတာ သတိထားမိတယ်။ တကယ်တော့ သူ့မွေးနေ့တရက်မှာပဲ သူနဲ့ကျနော် ကျောင်းသားတပ်မတော် ဌာနချုပ် ဒေါင်းခွင်ကနေ ၁ နာရီလောက် စက်လှေ မောင်းသွားရတဲ့ သံလွင် စခန်းက ဆရာတော် ဦးသံဝရရဲ့ ကျောင်းကို သွားခဲ့ဘူးတယ်။ သူက ပဲ့ထောင်စက်လှေကို မောင်းနိုင်သူမို့ သူမောင်းတဲ့လှေနဲ့ သူ့မွေးနေ့ အထိမ်းအမှတ် ဘုန်းကြီးကျောင်းသွား အလှုလုပ်ခဲ့ကြတာ့ သတိရနေမိရဲ့။

အဲ့ဒီမှာ သူက ၁၉၇၄ ခုနှစ် ဒီဇင်ဘာလက ဖြစ်ခဲ့တဲ့ ဦးသန့်အရေးအခင်း အကြောင်းကို ပြောပြလို့ ကျနော် သိခဲ့ရတယ်။ ကိုတိတ်ဟာ ပဲခူးကနေ အထက်တန်း အောင်ပြီး ၁၉၇၀ ခုနှစ်မှာ ရန်ကုန် ၀ိဇ္ဇာသိပ္ပံ တက္ကသိုလ်မှာ စိတ်ပညာအဓိကနဲ့ တက်ခဲ့တယ်။ ၁၉၇၄ ခုနှစ် ကျောင်းသားလှုပ်ရှားမှု (ဦးသန့်အရေးတော်ပုံ)မှာ မန္တလေးဆောင် အမှုဆောင်လုပ်ခဲ့လို့ အဖမ်းခံရပြီး ထောင် ၅ နှစ် ကျခဲ့တယ် ဆိုတာတွေ သိခဲ့ရပါတယ်။ ၅ ရက် ဒီဇင်ဘာ ၁၉၇၄ ခေါင်းစဉ်နဲ့ ဦးသန့် အရေးတော်ပုံ ဆောင်းပါးကို ဒေါင်းအိုးဝေမှာ သူရေးခဲ့ပါတယ်။ ဒီမှာတင် မဆလခေတ် ကြိုးပေးခံခဲ့ရတဲ့ ကျောင်းသားခေါင်းဆောင် ဆလိုင်းတင်မောင်ဦးအကြောင်း၊ ဦးသန့် အရေးတော်ပုံ၊ မှိုင်းရာပြည့် အရေးတော်ပုံတွေကို သိလာရတာပါ။




ကိုတိတ်၊ ဦးတိတ်၊ အဘတိတ်၊ မောင်မောင်တိတ် စသဖြင့် ကျနော်တို့ အမျိုးမျိုးခေါ်ကြတဲ့သူ့အမည်ဟာ ကျောင်းသားတပ်တခုလုံးတင်မက ကေအင်န်ယူ ဌာနချုပ် မာနယ်ပလော၊ ကချင်၊ ကယား၊ ရခိုင်စတဲ့ လက်နက်ကိုင် တပ်ပေါင်းစုတွေကြားမှာ မွှေးပျံ့လို့နေပါတယ်။ သူဟာ ဦးသန့် အရေးတော်ပုံမှာ ထောင် ၅ နှစ်ကျသလို၊ ၁၉၈၂ ခုနှစ်ကလည်း ပုဒ်မ ၅ ည (အရေးပေါ်စီမံချက်ဥပဒေ) နဲ့ ၂ နှစ်ထပ်ကျခဲ့ပါသေးတယ်။ သူဟာ သူနဲ့သိမီကြုံတွေ့ခဲ့တဲ့ ကျောင်းသားသမိုင်းကို မှတ်တမ်းတင်သလို၊ ဘက်စုံ သမိုင်းဆိုင်ရာ တွေကိုလည်း လေ့လာခဲ့သူ သုတေသနလည်း လုပ်နေခဲ့သူ လူငယ်တွေကိုလည်း ဟောပြောပို့ချခဲ့သူ၊ ရွယ်တူတွေကိုလည်း တိုင်ပင်နှီးနှော ဆွေးနွေးခဲ့သူပါ။ သူပြောခဲ့သမျှထဲ မှတ်မှတ်ရရကတော့ ((( ကျောင်းသားတွေအပါအ၀င် မိဘပြည်သူ တရပ်လုံး အခွင့်အရေးအတွက် ရှေ့တန်း တပ်ဦးက စတင် ဦးဆောင် တော်လှန်သူတွေဟာ ကျောင်းသားတွေပဲကွ။ ဒီလိုတော်လှန်တဲ့စိတ်ဟာ ကျောင်းသားစိတ်ပဲ။ ဒီစိတ်ရှိသူတိုင်း ကျောင်းသားပဲ၊ ကျောင်းတက်နေချင်တက်မယ်။ ဆန္ဒပြသပိတ်မှောက်နေချိန်လဲ သူပါချင်ပါနေမယ်။ ထောင်ထဲရောက်နေချိန် လည်း ဖြစ်ချင်ဖြစ်မယ်။ အခုလို တောထဲမှာ လက်နက်ကိုင်နေချင်လည်း ကိုင်နေမယ်။ လယ်သမားဖြစ်ဖြစ်၊ ကုန်ကုန်ပြောမယ် ကျောင်းဆရာ ဖြစ်နေရင်တောင် ကျောင်းသားစိတ်ရှိနေရင် ကျောင်းသားပဲကွ။))) ဆိုပြီး ဒေါင်းခွင်ဌာနချုပ် အခမ်းအနားတခုမှာ ဆိုခဲ့ပါတယ်။ ဒါကြောင့်လည်း ကျောင်းသားတပ်မတော်မှာ အသက် ၆၄ နှစ် ကွယ်လွန်ချိန် အထိ ကျောင်းသားအိုကြီး ရဲဘော် မောင်မောင်တိတ် အဖြစ်နဲ့ပဲ တာဝန်မျိုးစုံ ထမ်းဆောင်သွားနိုင်ခဲ့တာပါ။ ပြောချင်သူတွေက ၆၄ နှစ် အဖိုးကြီးက ကျောင်းသားမဟုတ်ဘူးလို့ ပြောဦးမလား မသိပါ။

သူနဲ့ ကျနော် ကျောင်းသားတပ်မတော် ဌာနချုပ် ဒေါင်းခွင်မှာ စကားတွေ အများကြီး ပြောခဲ့ကြတယ်။ ဒါကြောင့် သူအကြောင်းတွေ သိခွင့်ရခဲ့တာပေါ့။ ကျောင်းသားအိုကြီး ရဲဘော် မောင်မောင်တိတ်ဟာ ၁၉၈၈ မတိုင်ခင်အထိ ပဲခူးမြို့မှာ စက်ရေတွင်းတူး အလုပ်လုပ်ခဲ့သလို၊ ကျူရှင်ဆရာလည်းလုပ်ခဲ့တယ်။ သူ့ဇာတိ မမောက်ရွာမှာ ကျောင်းဆရာလည်း လုပ်ခဲ့တယ်။ ၈၈၈၈ မှာ ပဲခူးမြို့ကနေ ပါဝင်ခဲ့ပြီး ၁၉၈၈ ခုနှစ် စက်တင်ဘာ ၁၈ စစ်အာဏာသိမ်းတဲ့အခါ ကရင်ပြည်နယ်ကို တောခိုလာခဲ့တယ်။ တပ်ရင်း ၂၀၉ သံလွင်စခန်းကို ရောက်လာပြီး တာဝန်အဆင့်ဆင့် အမျိုးမျိုးထမ်းဆောင်ခဲ့ရာမှာ ဗဟိုကော်မတီဝင်၊ ရှေ့တန်းစစ်ကြောင်းမှုး၊ ဗဟိုတရားသူကြီးတာဝန်တွေပါဝင်ခဲ့ပါတယ်။

သူ့နဲ့ကျနော် ကျောင်းသားတပ်မတော် စစ်ကြောင်းတခုထည်းမှာ အတူတွဲတိုက်ခဲ့ဘူးတယ်။ စောထတိုက်ပွဲမှာဆို ကျနော်တို့ဖက်က အကျအဆုံး တချို့ရှိခဲ့တယ်။ တပ်မှုးတဦး ဖြစ်တဲ့ ဦးတိတ်ဟာ ခံစစ်ကတုတ်တွေထည်းထိ လိုက်လံ အားပေးစကား ပြောခဲ့တယ်။ အိမ်ထောင်ပြုတာကို သူက အားမပေးခဲ့ပါ။ ရဲဘော်တယောက် မိန်းမယူတိုင်း သူက စိတ်မကောင်း ဖြစ်တတ်ပါတယ်။ တော်လှန်ရေးအတွက် အားတခု လျော့သွားပြီလို့ ပြောလေ့ရှိတယ်။ ဒါပေမယ့် မင်္ဂလာဆောင်ပွဲကိုတော့ သူက ဦးဆောင်လေ့ရှိတယ်။ လူကြီးအနေနဲ့ ဆုံးမစကားတွေ ၀င်ပြောတတ်တယ်။ ဒါနဲ့ပဲ မာနယ်ပလောခံစစ် ကျတယ်။ ဒါးဂွင်က ဆုတ်ခဲ့ကြရတယ်။ စခန်းတွေ ပြောင်းကြ။ ရွှေ့ကြနဲ့ ကရင်နီဒေသကို ဒေါင်းဂွင်ဗဟိုပြောင်းတယ်။ နောက်ထပ် ကရင်နယ်ဖက်ပြန်ပြောင်း ဟိုပြောင်းသည်ပြောင်း ဖြစ်နေပေမယ့် ကျောင်းသားအိုကြီး ရဲဘော် မောင်မောင်တိတ် ကတော့ စိတ်မာဆဲ။ ၂၀၀၀ ပြည့်နှစ် အောက်တိုဘာလ ၂၄ ရက် (ကမ္ဘာ့ကုလသမဂ္ဂနေ့) မှာ တော့ အိမ်ထောင်ပြုတာကို ဆန့်ကျင်လေ့ရှိတဲ့  ကျောင်းသားအိုကြီး ရဲဘော် မောင်မောင်တိတ်ဟာ ပရဟိတ သမားတဦး ဖြစ်တဲ့ မမေမေကြည်နဲ့ အိမ်ထောင်ပြုခဲ့ပါတယ်။ တော်လှန်ရေးအတွက် အာနည်းသွားမှာမို့ ဦးတိတ် လက်မထပ်ရဘူးလို့ ကျနော်တောင် နောက်ခဲ့ပါသေးတယ်။ သူတို့မှာ သားကလေးတယောက်ထွန်းကားခဲ့ပါတယ်။

ကျောင်းသားအိုကြီး ရဲဘော် မောင်မောင်တိတ် ဟာ  မနှစ်က၂၀၁၄ ခုနှစ် စက်တင်ဘာလ ၁၁ ရက်မှာ ကွယ်လွန်သွားပါတယ်။ သူမမာမကျန်းဖြစ်ချိန် ကျနော်လည်း နေမကောင်းနေလို့ မသွားနိုင်ခဲ့ပါ။ သူ့အကြောင်း ဂုဏ်ပြုစာ ရေးချင်ပေမယ့် ကျနော့်လက်တွေက မလှုပ်ရှားနိုင်ခဲ့ပါ။ ဒါပေမယ့် ကျနော့် ရေးချင်စိတ်ကတော့ ပျောက်မသွား။ ရေးနိုင်လာချိန်ကျတော့လည်း အကြောင်းမတိုက်ဆိုင်ခဲ့။  ဒီနေ့ မှတ်မှတ်ရရ ဒေါင်းအိုးဝေ ဖတ်မိချိန် ၀မ်းနည်းမှတ်တမ်းမှာ သူ့ရဲ့ မွေးနေ့ မေလ ၂၃ ရက်ကိုတွေ့တော့ အမှတ်တရ ရေးလိုက်ရပြီပေါ့။ ၁၉၅၀ ခုနှစ်မွေးဆိုတော့ သူရှိနေသေးရင် ၆၅ နှစ်ပေါ့။ ဒါပေမယ်သူဟာ နောက်ဆုံး အချိန် အထိ ကျောင်းသားပါ။ ကျောင်းသားတပ်မတော်ရဲ့ ခွပ်ဒေါင်းအလံအုပ် အလေးပြု ပြီးမှ သူ့ရုပ်ကလပ်ကို သင်္ဂြိုလ်ခဲ့ကြပါတယ်။

သူကွယ်လွန်သွားတာ တနှစ်ပတ်လည်ပြည့်ဖို့ တဖြည်းဖြည်းနီးလာနေပါပြီ။ ဒါပေမယ့် ကျောင်းသား တပ်မတော် ယူနီဖေါင်းနဲ့ သူစကားပြောနေပုံတွေ၊ စစ်မြေပြင်မှာ သေနပ်တလက် လွယ်လျက်နဲ့ ရဲဘော်တွေကို အားပေးစကားပြောနေပုံတွေ၊ တပ်နားချိန်တွေဆို ရဲဘော်တွေကို အင်္ဂလိပ်စာ သင်ပေးနေပုံတွေ၊ ဖေါက်ပြန်တဲ့ အတွေးအမြင် ရှိသူတွေနဲ့ စကားပြောချိန် ဒေါသဖြစ်နေပုံတွေ၊ ငှက်ဖျားမိနေတဲ့ ရဲဘော်လေးတွေကို ဖခင်သဖွယ် အားပေးနေပုံတွေ၊ ဒေါင်းခွင်ဗဟို စားဖိုဆောင်မှာ ပုဆိန်တလက်နဲ့ ထင်းခွဲနေပုံ၊ ပေါက်တူးတလက်နဲ့ မြက်ရှင်းနေပုံ၊ မျှစ်ပလိုင်းကြီးကို လွယ်လာပုံ၊ သံလွင်မြစ်ထဲ စက်လှေမောင်းနေပုံတွေ မြင်ယောင်နေဆဲပါ။

ဒါပေမယ့် တချို့ကတော့ ဒီမိုကရေစီပညာရေး သပိတ်မှောက်ကျောင်းသားတွေဟာ ကျောင်သားတွေ အစစ်တွေ မဟုတ်ဖူးလို့ ပြောကြသလို ခွပ်ဒေါင်း ကျောင်းသားအိုကြီး ရဲဘော် မောင်မောင်တိတ် ကိုလည်း ကျောင်းသား မဟုတ်ဖူးလို့ ပြောကြဦးမယ် ထင်ပါရဲ့။ ။ 

မောင်စိုးချိန် - ကျောင်းသားသပိတ် အရေးတော်ပုံ (၈)


 မောင်စိုးချိန် - ကျောင်းသားသပိတ် အရေးတော်ပုံ (၈)
(မိုးမခ) မေ ၂၆၊ ၂၀၁၅

• သေမင်း
(က)
ဖိနှိပ်အုပ်စိုး
ကိုယ်ကျိုး
ကိုးကွယ်ရာ အာဏါ
အဓွန့်ရှည်ကြာရေး
လူထုသွေး ချွေး
စတေး
ခြေဆေး
မိစ္ဆာ
အာဏါသေမင်း
သေတွင်းဝမှာ။

• သမိုင်းမြေမှာ
(ခ)
သူရဲကောင်း
လမ်းဟောင်းဖျက်
လမ်းသစ် ဆောက်ရင်း
သေမင်း
စီးချင်းထိုး
ရှေ့တိုးရင်ဆိုင်
ပန်းတိုင်ဖောက်
အရောက်ချီသူ
ကမ္ဗည်းတင်
သစ်လွင်တောက်ပဆဲ။

• သူရဲကောင်း
(ဂ)
အားသစ်
လမ်းသစ်ဖောက်သွား
ကျောင်းသား
ရှေ့တက်ရှေ့ဆက်
သေမင်းလက်မှာ
ဘာမှမမှု
အံတုနေဆဲ။

မောင်စိုးချိန်
မတ် ၂- ၂၀၁၅

သရုပ်ဖော်ပန်းချီ သန်းဌေးမောင်

ကစားကွင်းနေရာ ကြံ့ခိုင်ရေးပါတီ ကွန်ဒိုဆောက်နေခြင်း ရပ်ဆိုင်းပေးရန် ကိုကိုကြီးပြော

ကစားကွင်းနေရာ ကြံ့ခိုင်ရေးပါတီ ကွန်ဒိုဆောက်နေခြင်း ရပ်ဆိုင်းပေးရန် ကိုကိုကြီးပြော
ဟန်သစ်နိုင်၊ မိုးမခ
 မေ ၂၆ ရက်၊ ၂၀၁၅

တောင်ဥက္ကလာပမြို့နယ် (၉)ရပ်ကွက် သစ္စာလမ်းနှင့် ဝေဇယန္တာလမ်းထောင့်ရှိ အားကစားကွင့်နှင့် ပန်းခြံနေရာ ပြန်လည်ရရှိရေးအတွက် ဒီဇင်ဘာ ၂၁ရက် ၂၀၁၄ခုနှစ်က ဆန္ဒထုတ်ဖော်ခဲ့သော ဦးဆောင်သူ ဦးကိုကိုကြီး၊ ဒေါက်တာဇော်နိုင်၊ ကိုမျိုးခင်၊ ကိုနိုင်ကိုလင်း၊ ကိုအောင်မော်တို့ကို ပုဒ်မ ၁၉ဖြင့် တောင်ဥက္ကလာ မြို့မရဲစခန်းက တရားဆွဲထားခဲ့သည်။ ဒေါက်တာဇော်နိုင်၊ ကိုမျိုးခင်၊ ကိုနိုင်ကိုလင်း၊ ကိုအောင်မော်တို့ကို ခံဝန်ဖြင့် လွှတ်ထားခဲ့ပြီး ဦးကိုကိုကျန်နေသဖြင့် မေလ ၂၂ရက်နေ့ တွင် တောင်ဥက္ကလာမြို့မရဲစခန်းမှ (ပ)၅၂၈/၁၄ငြိမ်း/စု/စီ ပုဒ်မ ၁၉ ဖြင့် တရားဆွဲထားသောကြောင့် ထိုအမှုကိုစစ်ဆေးရန်အတွက် ရဲစခန်းမှ လူတွေ့စစ်ဆေးခဲ့သည်။
          
ကိုကိုကြီးနှင့် ဇနီး
 ထိုဖြစ်စဉ်နှင့်ပတ်သက်၍ ၈၈ မျိုးဆက် ငြိမ်းချမ်းရေးနှင့် ပွင့်လင်းလူ့အဖွဲ့အစည်းမှ ဦကိုကိုကြီးက “ဒီနေရာဟာ ကျနော်တို့ ကိုယ်တိုင်ငယ်ငယ်လေးကတည်းကဆော့ခဲ့ပြုခဲ့တဲ့ကလေးကစား ကွင်းနေ ရာ ဖြစ်တယ်၊ နောက်ဆုံး ၁၉၈၈ ခုနှစ်က အာဏာသိမ်းခဲ့တဲ့စစ်တပ်ကလည်း ဒန်းတွေ၊ လျှောတွေ၊ ပန်းခြံတွေနဲ့ ကလေးကစားကွင်းအဖြစ် အာဏာသိမ်းပြီးတာတောင်ဆက်ရှိနေသေးတယ်၊ ကျနော်ထောင်ကျပြီးပြန်ထွက် လာတော့ ဒီနေရာက ကြံ့ခိုင်ရေးပါတီပိုင်ဖြစ်သွားပြီ ကွန်ဒိုဆောက်နေတယ်  သိရတဲ့အတွက်ကြောင့် ဒီကဒေသခံမြို့မိမြိဖတွေက ဒါကိုဆန္ဒဖော်ထုတ်ချင်တယ် ကျနော်လည်း မြို့ခံဖြစ်တဲ့အတွက်ကြောင့် ဦးဆောင်ပါဝင်ခဲ့တာဖြစ်တယ် အဓိကက ဒီကလေးကစားကွင်းကို ပုံမှန်တိုင်းပြန်ပြီးဖော်ထုတ်စေချင်တယ်၊ အားလုံးသိထားတဲ့အတိုင်း အများပိုင်မြေနေရာ၊ ကလေးကစားကွင်းကို ရုပ်ပျက်ဆင်းပျက်ကြီးမတရားအနိုင်ကျင့်တာမလုပ်ပါနဲ့ ကလေးတွေကစားဖို့ ပြန်ပေးပါ ရိုးရိုးသားသားလေးပြန်တောင်းတာပါ” ဟုပြောပြခဲ့သည်။
 
                          ကစားကွင်းရှေ့တွင် ရှင်းပြနေပုံ
ဆက်လက်၍ ငြိမ်းချမ်းစွာဆန္ဒဖော်ထုတ်ခြင်းကို ပုဒ်မ ၁၉ဖြင့်တရားစွဲဆိုနေခြင်းနှင့်ပတ်သက်ပြီး ဦးကိုကိုကြီးက “ဆန္ဒဖော်ထုတ်တယ်ဆိုတာ မြင်စေချင် ကြားစေချင်လို့ဖော်ထုတ်တာ၊ ခွင့်ပြုတယ် သတ်မှတ်ပေးတဲ့နေရာဟာ အများပြည်သူ တာဝန်ရှိတဲ့အရာရှိတွေ ပုဂိုလ်တွေ မြင်နိုင်ကြားနိုင်တဲ့ နေရာဖြစ်ရမယ်၊ အခုကျနော်တို့ကို ခွင့်ပြုတဲ့နေရာဟာ နံရံလေးဘက် အုတ်ရိုးခတ်ထားပြီး ကျနော်တို့နေခဲ့တဲ့ ထောင်လိုပဲ အထဲမှာဘယ်သူတွေ ဆန္ဒပြလို့ ဘာတွေပြောနေမှန်းမသိ အပြင်ကမကြားနိုင် မသိနိုင်တဲ့နေရာ၊ လိုင်းကားမရှိဘူး လူစည်ကားတဲ့ နေရာမဟုတ်ဖူး၊ အဲဒီလိုနေရာမျိုးမှာ သွားပြီးဆန္ဒပြဆိုပြီး သတ်မှတ် ပေးတာ ကိုက ဆန္ဒဖော်ထုတ်မှုကို မမြင်အောင် မကြားအောင် ဟန့်တားထားနတဲ့သဘောပဲ၊ ဒါ့ကြောင့် အခင်းဖြစ်တဲ့ နေရာမှာ ကျနော်တို့ ဆန္ဒပြခဲ့တာဖြစ်ပါတယ်” ဟုပြောသည်။
ဌာနဆိုင်ရာမှတာဝန်ရှိသူများမှ အခင်းဖြစ်နေသော မြေရာဇဝင်များကို ထုတ်ပြမပေးခဲ့ခြင်းများ၊ ကလေးကစားကွင်းနေရာပြန်လည်ရရှိရေးအတွက် လွှတ်တော်များ၊ တရားရုံးများနှင့် ရန်ကုန်မြို့တော်စည်ပင်သာယာရေးကော်မတီများကိုလည်း တင်ပြဆောင်ရွက်သွား မည်ဖြစ်ကြောင်း ဦးကိုကိုကြီးမှ ပြောပြသည်။

ကစားကွင်းကို ကွန်ဒိုဆောက်ရာနေရာ

ကာတွန်း လိုင်လုဏ် - မီးလင်းကုန်ပြီ


ကာတွန်း လိုင်လုဏ် - မီးလင်းကုန်ပြီ
မေ ၂၅၊ ၂၀၁၅

သားကြီး မောင်ဇေယျ - ဥပဒေစစ်မြေပြင်က ခွပ်ဒေါင်းများ

သားကြီး မောင်ဇေယျ - ဥပဒေစစ်မြေပြင်က ခွပ်ဒေါင်းများ
အကြမ်းဖက်ခံကျောင်းသားများ (၇) ကြိမ်မြောက် ရုံးထုတ်
(မိုးမခ) မေ ၂၅၊ ၂၀၁၅
 
x x x ကျဉ်းကျဉ်းကြပ်ကြပ် ဘယ်လိုပဲဖြစ်ဖြစ် ကျနော်တို့ဟာ တရားခွင်နဲ့ အမှုသည်နဲ့ ရှေ့နေနဲ့ လွပ်လွပ်လပ်လပ် စစ်ခွင့်ရရင် ကျေနပ်ပြီx x x

ဆံပင်ဖြူဖြူ အသက် ၆၀ ကျော် ရှေ့နေကြီးဦးအောင်သိန်းက သူ့ရှေ့မှာရှိတဲ့ ကျောင်းသားမိဘတွေ၊ မီဒီယာတွေကို သာယာ ၀တီတရားရုံးရှေ့မှာ ရှင်းပြနေတာပါ။ မနက် ၉ နာရီလောက်သာရှိသေးပေမယ့် နေပူရှိန်က အတော်ကလေးမြင့်နေပါပြီ။ ကျနော်နဲ့  ဒီဗွီဘီသတင်းထောက် ကိုထွန်းကျော်တို့က ရှေ့နေဦးအောင်သိန်းရဲ့ပြောစကားတွေကို ဗီဒီယိုမှတ်တမ်း ရသ လောက်ရိုက်ယူနေပါတယ်။ ရှေ့နေဦးအောင်သိန်းဆိုတာ ကျနော်နဲ့ရော ကိုထွန်းကျော်နဲ့ပါ သူစိမ်းတွေမဟုတ်ပါဘူး။ ကျ နော်တို့ကို မီဒီယာအမှုနဲ့ တရားစွဲခံရတုန်းကလည်း ရှေ့နေလိုက်ပေးခဲ့ရသူက ဒီဦးအောင်သိန်းပဲဖြစ်ပါတယ်။ တနည်းပြော ရရင် ကျနော်တို့ရဲ့ ဖောက်သည်ဟောင်းကြီးပေါ့။

ရှေ့နေဦးအောင်သိန်းနဲ့ မလှမ်းမကမ်းမှာ မျက်နှားဝိုင်းဝိုင်း ကတုံးကေနဲ့ မန္တလေးက ရှေ့နေဦးသိန်းသန်းဦးကလည်း ဒီဗွီဘီ သတင်းထောက် ကိုဉာဏ်ကြီးကို ခုလိုပြောလိုက်ပါတယ်။

x x ဥပဒေအရ ကန့်သတ်ချက်မရှိရင် အများပြည်သူတွေရှေ့မှောက်မှာ တရားစီရင်ရမယ် open court ပေါ့။ အခုဆွဲထားတဲ့ ပုဒ်မတွေက ၁၄၃ ၁၄၅ ၁၄၇ ၆၀၅ (ခ) ပါ တံခါးပိတ်စစ်ရမယ်လို့ မပါဘူး x x

ရှေ့နေတွေရဲ့စကားကိုထောက်ရင်  မြန်မာနိုင်ငံရဲ့တရားစီရင်ရေးဟာ လွပ်လပ်မျှတမှုတွေ၊ ပွင့်လင်းမြင်သာမှုတွေ အားနည်း နေပြီး စိုးရိမ်ဘွယ်အခြေအနေတခုမှာ ရှိနေတယ်ဆိုတာ ခန့်မှန်းနိုင်ပါတယ်။

ရှေ့နေဦးသိန်းသန်းဦးဟာ စစ်အစိုးရကိုအာခံခဲ့တဲ့ ကျောင်းသားဆိုးတယောက်အဖြစ် မြန်မာ့ဆိုရှယ်လစ်ခေတ်မှာ ထောင်အ ကြိမ်ကြိမ်ကျခံခဲ့ရတဲ့ ဆေးကျောင်းသားဟောင်းတယောက်ပါ။ ခု သူက သပိတ်မှောက်ကျောင်းသားတွေဖက်က လိုက်နေတဲ့ ရှေ့နေ။ တနည်းပြောရရင် စစ်အစိုးရ ရေးဆွဲခဲ့တဲ့ ဥပဒေ အောက်မှာ ခက်ခက်ခဲခဲ ရှင်သန်ခဲ့ရသူ။ ဥပဒေ လက်နက်ကိုဆွဲကိုင်ပြီး စစ်အစိုးရ ရေးဆွဲခဲ့တဲ့ ဥပဒေကို အာခံနေသူ။ ဥပဒေ စစ်မြေပြင်ရောက် လူတယောက်။

သူလိုပဲ သပိတ်မှောက်ကျောင်းသားတွေဖက်က ရှေ့နေလိုက်နေသူ  ကျောင်းသားဆိုးတဖြစ်လဲ ရှေ့နေတယောက်လည်း ရှိပါသေးတယ်။ သူက ဦးရောဘတ်စန်းအောင်ပါ။

သူဟာ လွယ်အိပ်ပြာကြီး လွယ်ရင်း မျက်မှန်ကြီးတ၀င့်တ၀င့်နဲ့ ဒီဗွီဘီသတင်းထောက် ကိုရန်နိုင်ကို တရားရုံး ၀င်ပေါက်ဝနားမှာ ရပ်ရင်း ရှင်းပြနေပါတယ်။

ပြင်သစ်သံရုံးက နိုင်ငံရေးအရာရှိရယ်၊ အီးယူသံမှူးရယ်၊ ဂျာမန်သံရုံးကရယ် လာကြတယ်ပေါ့နော်။ လာပြီးတော့လေ့လာ တယ်ဆိုတာက  ဒီမှာစစ်ဆေးစီရင်နေတဲ့ စစ်ဆေးစီရင်ပုံဟာ တရားမျှတတဲ့ စစ်ဆေးစီရင်ပုံ ဖြစ်/မဖြစ်ဆိုတာ လေ့လာ ဖို့လာကြတာပါ။

ဒီနေ့တရားခွင်အနေအထားရဲ့ ထူးခြားချက်တခုရှိပါတယ်။

အဲဒါကတော့ သတင်းထောက် ကိုဉာဏ်ကြီးရဲ့ သတင်းထောက်တွေ တရားရုံးတွင်း ၀င်ရောက်သတင်းယူခွင့် တောင်းဆိုတာ ကို တရာသူကြီးက ခွင့်ပြုလိုက်တာပါ။

ဒီလိုထူးထူးခြားခြားခွင့်ပြုလိုက်တာကို မီဒီယာသမားတွေက ပွင့်လင်းမြင်သာတဲ့ တရားစီရင်ရေးလမ်းကြောင်းပေါ်ရောက်ဖို့ ပထမခြေလှမ်း အဖြစ်ရှုမြင်လိုက်ကြပါတယ်။ ကျောင်းသာခေါင်းဆောင် ကိုသီဟ၀င်းတင်ကတော့ ခုလိုမြင်ပါတယ်။

သဘောရိုး စေတနာနဲ့ခွင့်ပေးတာမဟုတ်ဘူး၊ နိုင်ငံတကာက လေ့လာသူတွေလည်းပါတယ်။ ဒီလိုအနေအထားမျိုးမှာ သူတို့ အနေနဲ့ ဖွင့်ပေးတာဖြစ်တယ်။ နောက်တချက်ကတော့ အကုန်လုံးကို  ၁၀ ယောက်တသုတ်စီ ပေးဝင်မယ်ပြောတယ်။ ဒါကို ကြည့်ရင် အစိုးရအနေနဲ့ မပြောပဲနဲ့ မရဘူး၊ မတိုက်ပဲနဲ့ မရဘူး။ တကယ်ဆို အစိုးရအနေနဲ့ ပုံမှန်သာဆိုရင် ကျနော်တို့ ပြောစရာမလိုဘူး တိုက်စရာမလိုဘူး။ အစောကြီးကတည်းကဖြစ်ရမယ်ကိစ္စလို့ မြင်တယ်။

ကျောင်းသားတွေရဲ့အမြင်ဟာ သမိုင်းအဆက်ဆက် ပွင့်လင်းစူးရှခဲ့ကြတာ ခုထက်ထိပါပဲ။ တိတိကျကျပြောရင် ကျောင်းသား သမဂ္ဂပေါ်ပေါက်ခဲ့တဲ့ လွန်ခဲ့သော ၇၉ နှစ်ကတည်းကပါ။

ဗကသအနေနဲ့ နယ်ချဲ့အစိုးရ၊ ဖက်စစ်အစိုးရ၊ စစ်အစိုးရ၊ အစိုးရအဆက်ဆက်ကိုတော်လှန်ခဲ့တာ ရ၉ နှစ်ရှိပြီ။ ကျောင်းသား သမဂ္ဂ ၇၉ နှစ်ပြည့်ဟာ ဒီမိုကရေစီပညာရေး တိုက်ပွဲဝင်နေတဲ့ကာလလည်းဖြစ်တယ်။

ကျောင်းသားခေါင်းဆောင် ကိုမိုးထက်နေက လွပ်လပ်ရေးတိုက်ပွဲ၊ ဖက်စစ်တော်လှန်ရေးတိုက်ပွဲ ဒီမိုကရေစီတိုက်ပွဲတွေနဲ့ ကျောင်းသားတိုက်ပွဲသမိုင်းဟာ ချိတ်ဆက်မှုရှိနေကြောင်းကို လိုတိုရှင်း ပြောပါတယ်။ ဒီလိုချိတ်ဆက်မှုတွေရှိတယ်ဆိုတာသိတဲ့ အုပ်ချုပ်နေသူတွေဟာ ပညာရေးကို လုံခြုံရေးရှုထောင့်ချည်းကပ်ကာ ပြင်းပြင်းထန်ထန်ဖိနှိပ်ရင်း အာဏာကို ကျစ် ကျစ်ပါအောင် ဆုပ်ထားလေ့ရှိပါတယ်။

ဒါကြောင့်လည်း မြန်မာပြည်ပညာရေးဟာ ကိုလိုနီကျွန်ပညာရေး၊ စစ်ကျွန်ပညာရေးဆိုတဲ့  ကျွန်ပညာရေးနွံထဲက ရုန်းမထွက် နိုင်တာလို့ သုံးသပ်မှုတွေ ရှိနေပါတယ်။

ပညာရေးကို လုံခြုံရေးရှုထောင့်က  ကြည့်နေသမျှကာလတလျှောက်လုံး ပိုပြီးဆိုးဝါးသွားဖို့ပဲရှိပါတယ်လို့ အသားဖြူဖြူ ပါး ဖေါင်းဖေါင်းနဲ့ ကျောင်သူကလေး အိသဉ္ဇာမောင်ကဆိုပါတယ်။

ဒီလို လုံခြုံရေးရှုထောင့်ဖက်ကသာ ချည်းကပ်လုပ်ဆောင်ခဲ့တာကြောင့်  ကျောင်းသားတွေကို ရန်သူလိုသဘောထားပြီး ရိုက်နှက်ဖမ်းစီးခဲ့တာဖြစ်တယ်လို့ အများက ယူဆထားကြပါတယ်။

 ခုတော့ ကျောင်းသားတွေ ရုံးတင် တရားစွဲခံနေရပြါပါပြီ။

ဒီဖြစ်စဉ်မှာ ကျနော်ကိုယ်တိုင် အနီးမှာရှိနေပါတယ်။ ကိုယ်တိုင်လည်း တာဝန်ရှိသူတယောက်အနေနဲ့ ကြီးကြပ်လုပ်နေရတဲ့ လုပ်ငန်းတွေပါ။ မျက်မြင်တကယ့်ဖြစ်တဲ့ ဖြစ်စဉ်တွေကို ထွက်ဆိုတာပါ။

ပုခုံးပေါ်မှာ ငွေရောင်တလိုင်း တပွင့်နဲ့ တရားလို ရဲအရာရှိက  xxx  အေးအေးဆေးဆေး တည်တည်ငြိမ်ငြိမ် သတိကြီးကြီး နဲ့ သတင်းထောက် ကိုဉာဏ်ကြီးမေးသမျှကို ဖြေဆိုပါတယ်။

ဖမ်းစီးခံထားရတဲ့ ဥပဒေကျောင်းသူ မဟန်နီဦးကတော့

ကျမတို့ကို ရိုက်နှက်ပြီး ဖမ်းစီးတဲ့ရဲတွေက ကျမတို့ကိုပြန်ပြီး တရားဆွဲတယ်ဆိုတဲ့အချက်ဟာ လက်ရှိအချိန်မှာ တရားဥပဒေ စိုးမိုးမှုရှိမရှိဆိုတာ အထင်အရှားပြနေတာပါ။

 ဥပဒေသမားကောင်းတွေဟာ ဥပဒေအကြောင်းကောင်းကောင်းသိကြပါတယ်။

မြင်မြတ်တဲ့ဥပဒေသမားတွေကတော့ အမှန်တရားနဲ့ သစ္စာတရားကိုပိုပြီး ကောင်းကောင်းသိကြပါတယ်။

မြင့်မြတ်နှလုံးသား ပိုင်ရှင်တွေကတော့ စွန့်လွှတ်ရင်း၊ အနစ်နာခံရင်း၊ သစ္စာတရားဖက်က ရပ်တည်ရင်း.သူတို့ဘ၀သက်တမ်း ကို ကုန်လွန်ခဲ့လေ့ရှိပါတယ်။

ညနေစောင်းတော့ ကျောင်းသားတွေကို တရားရုံးနောက်ပေါက်ကထုတ်ကာ ထောင်ရှိရာဖက်ကို အချုပ်ကားတွေနဲ့ တင်ခေါ် သွားပါတယ်။

ကျနော်နဲ့ ကိုထွန်းကျော်တို့က တရားရုံး နောက်ပေါက်ကထွက်လာတဲ့ ကျောင်းသားအချို့ကို အမိအရ မှတ်တမ်းတင် ဗီဒီယို ရိုက်ကူးပါတယ်။ ၀န်းရံသူတွေနဲ့ ကျောင်းသားတွေဟာ ကြွေးကြော်သံတွေ အပြန်အလှန်တိုင်ရင်း လက်ပြနူတ် ဆက်ကြ ပါတယ်။

ကျောင်သားအချို့ကတော့ ထောင်သွားရာလမ်းတလျှောက် ခွပ်ဒေါင်းအလံတွေ တလူလူလွှင့်ရင်း အချုပ်ကားကိုပြေးလွှား ၀န်းရံ လိုက်ပါသွားကြပါတယ်။

ကိုဉာဏ်နဲ့ ကိုရန်နိုင်တို့က ကင်မရာခလုပ်ကိုဖွင့်ရင်း အပြေး အလွှား ။

သားကြီးမောင်ဇေယျ
၂၄-၀၅-၂၀၁၅

ဖိုးထက် - စိတ်ဖြောင့်စွာ စာဖတ်ပါရစေ

 ဖိုးထက် - စိတ်ဖြောင့်စွာ စာဖတ်ပါရစေ
(မိုးမခ) မေ ၂၄၊ ၂၀၁၅

ကျွန်တော့် စာဖတ်ဝါသနာက မနက်ခင်းစောစောမှာ စိတ်ပါ လက်ပါ လမ်းထလျှောက်တာနဲ့ တူသည်။ လမ်းစပြီး လျှောက် ခါစမှာ စိတ်ရှိပေမယ့် သွေးလေး၊ လူလေး၊ အိပ်ချင်မူးတူး။ ခဏကြာတော့ ခြေလှမ်းသွက်လာပြီး အိပ်ချင်စိတ်များ ပျောက် သည်။ နောက်တော့ လေကိုအားရပါးရ ရှူပြီး ချွေးတွေစို့လာအောင် လက်နှစ်ဖက်ကို ကားကားကြီးလွှဲကာ လမ်းလျှောက် သလိုမျိုး။ စာဖတ်တာအရှိန်ရလာလျှင် ခပ်သွက်သွက် ဖတ်သွားလို့ရသည်။

စာဖတ်နည်းတာ ကြာခဲ့သည်။ စာဖတ်နည်းလာတာ အပြစ်ကြီးတခု ကျူးလွန်မိနေသလို ခံစားနေရသည်။ “စာဖတ်၊ စာဖတ် နင့်ဘ၀မှာ ဒါလေးတခုဘဲ ကောင်းတာရှိတော့တာ” လို့ ကိုယ့်ကိုယ်ကိုယ် အားပေးရင်း စာကို ဖိဖိစီးစီး ပြန်ဖတ်ပြန်တော့ စာ မသွား။ စာမသွက်။ စာဖတ် ဦးဏှောက်ကို ပြန်နှိုးဖို့ စာအုပ်ကောင်းကောင်းတအုပ်တော့ လိုလေပြီ။ လမ်းလျှောက်အရှိန် ရလာလျှင် ပြေးလွှား၊ ခုန်ပေါက်ချင်လာသလိုမျိုး စာဖတ်ဉာဏ်ကို မြူးတူးရွှင်ပြလာစေဖို့ စိတ်ဝင်စားမည့်စာအုပ်တအုပ် တော့ လိုပြီ။ စာအုပ်စင်ပေါ်က စာအုပ်တွေ ပြန်ထုတ်ကြည့်မိသည်။

ဆရာမ ဂျူး ညွှန်းလွန်းသဖြင့် ၀ယ်ထားမိပြီး တလအတွင်း ငါးမျက်နှာထက် ပိုပြီးမဖတ်မိသည့် “To Kill A Mockingbird” စာအုပ်ထွက်လာသည်။ အပျိုကြီး ဆရာမညွှန်းတာ အလကားတော့ ဖြစ်ဟန်မတူဆိုသည့်စိတ်ဖြင့် ကြိုးစားဖတ်သော်လည်း စာလုံးတိုင်း၊ ၀ါကျတိုင်း၊ ဇာတ်ကောင်တိုင်း၊ နာမည်တိုင်း၊ ဗန်းစကားတချို့ကို သိချင်သည့်စိတ်ဖြင့် Google လုပ်ရင်း ဖတ် ရတာ ဇွဲကောင်းလွန်းသဖြင့်သာ ငါးမျက်နှာပြီးသည်။ တကယ်ဆို ကျွန်တော့်အင်္ဂလိပ်စာအရည်အချင်းနှင့် စာအုပ်ကို ပိုက် ဆံပေးဝယ်တာကိုဘဲ လွန်လှပြီ။ ကြည့်ပါအုံး။ စာအုပ်ခေါင်းစီး Mocking bird ကိုဘဲ ရှာကြည့်ရပြီ။ Google မှာ ပုံတွေ့တော့ သပိတ်လွယ်ငှက်လိုလို ဘာလိုလို။ အဘိဓာန်လှန်ကြည့်တော့ အမေရိကမှာတွေ့ရတတ်တဲ့ မြေလူးငှက်တဲ့။ အသံအမျိုးမျိုးကို တုပတတ်တဲ့ငှက်တဲ့။ ခက်တော့နေပြီ။ အမေရိကန် မြေလူးငှက်နှင့် မြန်မာမြေလူးငှက် ဘာကွာသနည်း။ မြန်မာ မြေလူး ငှက်ကတော့ ရွှံ့ပိုပေမှာ သေချာပြီ။ လူးစရာမြေမှ သူ့မှာ ကောင်းကောင်းရှိပါတော့မလား။ အမေရိကန် မြေလူးငှက်ကတော့ ကာလီဖိုးနီးယားနယ်သားတွေ ဖြစ်လေမလား။ “မြေလူးငှက်တကောင်ရဲ့ အဆုံးသတ်” လို့ ခပ်တည်တည်နှင့် ဘာသာပြန်၊ ငါးမျက်နှာလောက် အားတင်းဖတ်ပြီး ဖြေးဖြေးပေါ့။ “ဒီတောင်ကို မောင်ဖြိုမယ် မြင့်မိုရ်မို့လား” ဆိုသည့် အတွေးဝင်လာပြီး ချောင်ထိုးထားခဲ့ခြင်းဖြစ်သည်။

လာစမ်း နောက်တအုပ်။ ဆရာ သိန်းဖေမြင့်၏ “သပိတ်မှောက် ကျောင်းသား”။ လေးစားရသည့် ဆရာတယောက်ဆီက ခပ်တည်တည်ဖြင့် ငှားတာလိုလို၊ ဘာလိုလိုလုပ်ပြီး ယူလာပေမယ့် မတို့ မထိရသေး။ လွန်ခဲ့သော ငါးနှစ်ခန့်က ဖတ်ဖူးသည်။ ဒါကြောင့်သွေးက ခပ်အေးအေး။ ပြန်ဖတ်ကို ဖတ်ရမည့်စာအုပ်ဆိုတာ သိပေမယ့် အေးဆေးပေါ့။ ဘ၀က တိုတိုလေးရယ်လို့ တွေးပြီး စမထားမိသေး။ စာအုပ်ငှားလိုက်သည့်ဆရာကတော့ ကျိန်ဆဲနေရော့မလား။ ဆဲကာမှ ဆဲ။ အေးအေး ဆေးဆေး နောက်မှဖတ်ပြီး တောင်းပန်တော့မည်။

နောက်ထပ် တအုပ်ဆွဲချလိုက်ပြန်သည်။ သူလှိုင်ရေးသည့် မှန်နန်းဆောင်က လမ်းမျက်ရည် (သို့မဟုတ်) မဟေသီတပါး၏ ရင်ဖွင့်သံ။ ဒီစာအုပ်က ဘော်ဒါတယောက်ကိုပေးဖို့ရည်ရွယ်ထားခြင်း ဖြစ်သည်။ စုဖုရားလတ်နှင့်ပတ်သက်လျှင် အတော်ကြီး စုတ်စုတ်ပဲ့ပဲ့ဝေဖန်တတ်ပြီး စစ်အစိုးရက မဆိုးပါဘူးလုပ်တတ်သည့်သူ့ကို ကျွန်တော်က စာတအုပ်ဖြင့် ချေချွတ်အံ့ပေါ့။ စုဖု ရားလတ်လို သက်ဦးဆံပိုင်တယောက်မှားတာကိုကျတော့ ရစရာမရှိအောင်ဝေဖန်ပြီး ၂၁ ရာစုခေတ်မှာ ပုံ အမိန့်အရ အာဏာရှင်အစိုးရကိုကျတော့ လုပ်နည်းလုပ်ဟန် မှားနေတာ။ စေတနာကတော့ ရှိကြပါတယ်ဟုလုပ်တတ်သည့်သူ့ကို ပေး ဖတ်အံ့ပေါ့။ သေချာပြန်စဉ်းစားကြည့်တော့ သက်သက်မဲ့ မိတ်ပျက်မယ့်အကွက်ပါလေ။ မင်းက ဘယ်လောက် Educate ဖြစ်နေလို့ သူများကို Educate လုပ်မှာလဲ။ ကိုယ့်ဘာသာပျင်းရင် ပြန်ဖတ်ပေါ့လို့တွေးမိပြီး ချောင်ထိုးထားမိဖြင်း ဖြစ်ဟန် တူသည်။ နောက်တအုပ်က တမလွန်ဘ၀မှ ဖြစ်ရပ်ဆန်းများတဲ့။ ဘယ်ကောင် ငါ့စာအုပ်စဉ်ပေါ်လာတင်ထားပါလိမ့်လို့ တွေး မိပြီး ဖယ်ထားလိုက်သည်။ နောက်ထပ်စာအုပ်တွေကြည့်ပြန်တော့ ဆရာဖေမြင့်၏စာအုပ် ကမ္ဘာ။ ဆရာနေ၀င်းမြင့်၏ အေး အေးလူလူ အတွေးများ။ တအုပ်မှ မဖတ်ချင်။ ခက်တော့ နေပြီ။ ဒီအတိုင်းသာဆို ခုန်ပေါက်ချင်စိတ်မပေါက်ဘဲ လမ်းဘေးမှာ အိပ်ပျော်မယ့်အပေါက်။

ကျောပိုးအိတ်ထဲမှာ စာအုပ်လေးတအုပ် တွေ့မိသလိုလို။ ထကြည့်တော့ ကျော်ကိုကိုရေးသည့် “ကျောင်းသားသမဂ္ဂနှင့် ဒီမို ကရက်တစ် လူ့အဖွဲ့အစည်း” စာအုပ်။ ဟုတ်တာဘဲ။ သူငယ်ချင်းတယောက် မြန်မာနိုင်ငံအပြန်မှာ ဘာမှာမလဲမေးလို့ “စာ အုပ်တအုပ်လောက် ကြိုက်ရာဆွဲခဲ့ကွာ။ နိုင်ငံရေးဖြစ်ဖြစ်၊ ရသဖြစ်ဖြစ် တခုခုပေါ့။ ရသဆိုလို့ ဟင်းချက်နည်းတစ်ရာတော့ မလုပ်နဲ့ပေါ့ကွာ။ နိုင်ငံရေးထဲကဆိုရင်တော့ ဗိုလ်ချုပ်အောင်ဆန်းတို့၊ ဒေါ်အောင်ဆန်းစုကြည်မျက်နှာဖုံးတွေနဲ့ဆို လုံးဝ မ၀ယ်နဲ့ကွာ။ ကျန်တဲ့နိုင်ငံရေးစာအုပ် ကြိုက်တဲ့ကလောင်ရေးတာ ဆွဲခဲ့။ ငါဖတ်မယ်။ ဦးခင်ညွှန့်စာအုပ်ထွက်နေတယ် ပြော တယ်ကွ။ တွေ့ရင်ဝယ်ခဲ့ပေါ့ကွာ။ မတွေ့လည်း ခုနက ငါပြောသလိုဝယ်ခဲ့” ဟု ရှည်ရှည်လျားလျားမှာလိုက်ရာမှာ သူဝယ်ပေး လာသည့်စာအုပ်။

ဗိုလ်ချုပ်အောင်ဆန်း၊ ဒေါ်အောင်ဆန်းစုကြည်တို့ အထ္တုပ္ပတ္တိစာအုပ်တွေ ဒုတိယအရွယ်စနေပြီဖြစ်သည့် ကျွန်တော်မဖတ်ချင် တော့ ရိုးအီလှပြီ။ ဦးထွန်းကြည်၊ ဦးခင်ညွှန့်တို့စာအုပ်တွေကတော့ စစ်တုရင်ထိုးနည်းစာအုပ်ကို ဖတ်သလိုမျိုး ဖတ်လိုခြင်း သာ။ ဘယ်ကမ္ဘာကျော်စစ်တုရင်သမားမှ သူတို့၏တိုက်ကွက်အကုန်ကို စာအုပ်ထုတ်မရေးခဲ့သလို ဒီလူကြီးတွေဆီက စိတ် ကောင်း စေတနာကောင်းများဖြင့် သမိုင်းအမှန်တွေကို အိတ်သွန်ဖာမှောက် ပြောပြ၊ ရေးပြမည်လို့ နည်းနည်းမှ ကျွန်တော် မထင်။ အသွေးထဲ အသားထဲမှာ မြန်မာလူကြီးပိုင်း စစ်ခေါင်းဆောင်တွေ၏ သွေးတွေရှိနေအုံးမှာ သေချာသည်။ ကောက်ကျစ် သည့် သွေးများ၊ ရက်စက်သည့်သွေးများ၊ မိုက်မဲသည့် သွေးများ၊ သူရဲဘောကြောင် လက်သီးပုံးထိုးတတ်သည့် သွေးဆိုးများ၊ အတ္တမာန်မာနကြီးမားသည့် သွေးဆိုးများ၊ ထိုသွေးတွေက သူတို့ အသွေး၊ အသား၊ ရိုးတွင်းချဉ်ဆီထဲအထိ လှည့်လည်ပတ် နေမည့် သွေးဆိုးများ၊ အတုယူ ဂုဏ်ယူဖို့ သူတို့စာအုပ်တွေ ဖတ်လိုခြင်းမဟုတ်။ အိုနာကျ ကျားဆိုးကြီးတွေ၏ လေချဉ် တတ်တာတွေကို ထိုင်ကြည့်ချင်သည့်သဘော။ ဒီထက် မပို။ အခု သူငယ်ချင်းဖြစ်သူက သူတို့စာအုပ်ရှာမရဘူးဟုဆိုကာ ကျော်ကိုကို၏စာအုပ်ဆွဲလာတော့ စိတ်ဒုံးဒုံးချဖတ်တော့မည်ဟုတွေးပြီး ဇိမ်ယူဖတ်နေမိသည်။

စာအုပ်ကို စလှန်လှောစဉ်မှာ ကျော်ကိုကိုနှင့်ပါတ်သက်ပြီး အကြောင်းအရာနှစ်ခုက ခေါင်းထဲသို့ ရောက်လာသည်။ မိုးမခမှာ နိုင်ငံကျော် စာရေးဆရာကြီးတယောက်က (ဆရာကြီး မောင်စွမ်းရည်ဟုထင်။ သိပ်မသေချာ) ဒီစာအုပ်ကို ညွှန်းထားတာ ဖတ်လိုက်ရတာ သတိရသည်။ နောက်တခုက လောလောလတ်လတ် ပူပူနွေးနွေးဖြစ်ပျက်နေသည့် ကျောင်းသားသပိတ်မှာ ကျော်ကိုကိုအား ဒီမိုကရေစီဘက်တော်သားတချို့က အစာမကြေတာကို သတိရသည်။

ကျောင်းသားသပိတ်မှာ ကိုကျော်ကိုကို၏ သူ့ရဲဘော်တွေ အရိုက်ခံရ၊ ခွေးဆွဲသလို အဆွဲခံရခြင်းတွေကြောင့် လူငယ်ပီပီ အားမလို အားမရဖြစ်ကာ သူ၏ နောင်တော်ကြီးတွေကို ဝေဖန်မိသည့်စကားတွေ ပါလာဟန်တူ၏။ လူထု၏ (ကျွန်တော့်၏) သဲသဲလှုပ် ဒေါ်အောင်ဆန်းစုကြည်ကိုဝေဖန်တာ ပါလာဟန်တူသည်။ ကျော်ကိုကို ဒီလိုစကားတွေပါလို့ စန်းစန်းတင့် (sensitive) ဖြစ်ကြပြီး ကျော်ကိုကိုဆိုလျှင် ငါတို့ အားမပေးဆိုသည့်လူတွေ ဖြစ်ကုန်ကြသည်။ စစ်အစိုးရကတော့ ငါးခူပြုံး လေး ပြုံးနေမည်လား မသိပါ။ ကျွန်တော်ကတော့ ကြေကွဲရပါသည်။ ခေါင်းဆောင်တွေဆိုတာ ကျွန်တော်တို့လို နိုင်ငံရေး စိတ်ဝင်စားသည့် သာမန်ပြည်သူလူထုတွေကြောင့် ခေါင်းဆောင်ဖြစ်လာရတာ မဟုတ်ဘူးလား။ ကျွန်တော်တို့က ကျော်ကို ကိုလို ထောင်မကြောက် တန်းမကြောက် ဒုတ်မကြောက် ဓားမကြောက် စစ်ဘီလူးတပိုင်းအစိုးရကို ရဲရဲကြီး စိန်ခေါ်ရဲသည့် လူတွေလည်း မဟုတ်။ သို့သော် သူတို့ကို ဘယ်လိုအားပေးရမလဲ။ စိတ်အားဖြင့်၊ လူအားဖြင့်၊ မူအားဖြင့် အားပေးသည်။

ကျောင်းသားသပိတ်မှာ ကျော်ကိုကို၏ဝေဖန်ရေးစကားတွေကြောင့် ကျွန်တော်လည်းဘဲ သိပ်မကြိုက်တာတော့အမှန်။ သို့ ပေသိ စစ်အစိုးရ၏ ငါးနှစ်နီးပါး ဟန်ဆောင်နေသည့်မျက်နှာဖုံးကို ဆွဲခွာချပေးသည့်သူနှင့် ကျောင်းသားတွေ၏ ကျေးဇူးဖြင့် ယှဉ်လိုက်လျှင် ဘာမှပြောပလောက်သောကိစ္စမဟုတ်။ နိုင်ငံရေးမှာ သဘောကွဲနိုင်ကြသည် မဟုတ်ပါလား။ ပြီးတော့ သူက လူငယ်သာ ရှိသေးသည်။ မာနတွေ တလူလူတက်လို့ ကောင်းဆဲ။ အားအင်တွေ ပြည့်ဖြိုးဆဲ။ ကိုယ်ယုံကြည်ရာကို တုံးတိုက်တိုက် ကျားကိုက်ကိုက် တိုးမည့်အမျိုး။ ဒါကြောင့်လည်း မျိုးဆက်သစ် ကျောင်းသားခေါင်းဆောင်ဖြစ်လာဖြင်း ဖြစ် သည်။ သမိုင်းကြောင်းလှခဲ့သောလူငယ်၊ အညွှန့်တလူလူတက်နေသော လူငယ်၊ နိုင်ငံရေးလမ်းကြောင်းမှန်ပေါ်မှာ ရှိနေ သော လူငယ်၊ ပြည်သူလူထုအတွက် တိုက်ပွဲဝင် စဉ်းစားပေးသောလူငယ်၊ ကျောင်းသားထုတရပ်လုံးအတွက် အလုပ်တွေ အများကြီးလုပ်မည့် လူငယ်။

တစုံတဦးက ဒေါ်စုကိုထိလျှင်၊ ဝေဖန်မိလျှင် နိုင်ငံရေးမှာ ခေါင်းဖော်လို့မရလောက်အောင် အဘွားကြီးက နိုင်ငံရေး သြဇာအာဏာ ကြီးလှသည်။ ပြည်သူလူထု ကျွန်တော်တို့က နည်းနည်းမှ မကြိုက်။ ဘယ်ကြိုက်မှာလဲ။ ဒေါ်စု ရပ်တည်ချက်ကို ကျွန်တော်တို့က သိသည်။ အားပေးသည်ဘဲ။ ကျွန်တော်တို့ခေါင်းဆောင်ပေဘဲ။ ဒါပေသိ အဘွားကြီးကိုဝေဖန်တာ ဘယ်လို အရောင်တွေနဲ့ဝေဖန်သလဲ၊ ဘယ်လိုဆူးတွေပေါက်နေသလဲဆိုတာ ခဏလောက် အသက်ရှူအောင့်ပြီး ရပ်ကြည့်သင့်သေး သည် မဟုတ်ပါလား။

အာဃာတကြီးကြီးဖြင့် ဒေါ်စု ဘာလုပ်လုပ် ဖဲ့တိုက်ဝေဖန်နေသည့် ဆရာ့ ဆရာကြီးလူတွေလား။ ဒေါ်စုဆိုလျှင် ဆင်ဖြူ မျက်နှာ ဆင်မည်း မကြည့်ဝံ့ကြသလို သူတို့ စည်းစိမ်အာဏာတွေလုယူသွားတော့မယ့် မိန်းမကြီးလို့ထင်ပြီး တိုက်ခိုက်ဝေဖန် နေသည့် လူတွေလား။ သို့တည်း မဟုတ် ဒီမိုကရေစီလမ်းကြောင်း ဦးတည်ချက် လားရာတူသွားကြရာမှာ အဘွားကြီးသွားတာ မြန်လွန်းတယ်၊ စောင့်ပါအုံးဆိုသည့်သဘောဖြင့် ဝေဖန်ချင်တာလား ခွဲကြည့်ဖို့ မသင့်ပေဘူးလား။

ကျော်ကိုကို စာအုပ်မဖတ်ခင်မှာ ကျွန်တော်တွေးမိသမျှ ဖြစ်သည်။ စာမဖတ်ခင် ကျွန်တော်စိုးရိမ်စိတ်များနေခြင်းသာ။ ပြည် သူလူထု၏ရန်သူ၊ အာဏာကို လက်မလွှတ်ချင်ဘဲ ဂုပ်ခွစီးနေချင်သည့် စစ်အရာရှိများကို ယှဉ်ပြိုင်ကြရာမှာ ကျွန်တော်တို့ အချင်းချင်း သွေးကွဲနေလျှင်ဖြင့် မြေခွေးတွေက အမှောင်ထဲကစောင့်ကြည့်နေမှာ စိုးရိမ်သည်။ အခုအထိ ကိုကျော်ကိုကိုကို ဖမ်းလို့ မမိသေးတဲ့။ ဒီလောက် သူတို့စစ်ထောက်လှမ်းရေးယန္တရားကြီးကောင်းနေတာကိုမှ ဖမ်းလို့မမိတာကဖြင့် ကျော်ကိုကို တော်လို့ မဖြစ်နိုင်။ သူ့အသံတွေလည်း ရေဒီယိုတွေမှာ ကြားနေဆဲမဟုတ်လား။ အက်ကြောင်းကို မကြီးကြီးအောင်များ မြေခွေးစုတ်တွေက စောင့်ဆိုင်းနေကြသလားလို့ ကျွန်တော် အတွေးခေါင်မိသည်။

အတွေးတွေရပ်။ ဖတ်စရာရှိတာ ဖတ်မှပါလို့ ကျွန်တော်တွေးပြီး စာအုပ်ကိုစာဖတ်မိတော့သည်။ မြန်မာပြည်နိုင်ငံရေးမှာ ကျောင်းသားတွေ ခေတ်အဆက်ဆက် ဆက်စပ်ပါတ်သက်ခဲ့တာတွေမှန်သမျှ တိုတို ရုံးရုံး သူက ရေးထားသည်ပဲ။ တစစီ ပြန့်ကျဲနေသော ကြယ်လေးများကို တခုနှင့် တခု အဆက်အစပ်ရှိအောင် သူက တွဲသီထားသည်ဘဲ။ သူ့စာတွေဖတ်ရတာ သူကိုယ်တိုင်လည်း ရှင်းရှင်းပြတ်ပြတ်ရှိတယ် ထင်သည်။ အတွေးရှင်းတော့ အရေးလည်း ရှင်း၊ အကြောင်းအရာလည်း ရှင်း၊ နိုင်ငံပေါ်မှာထားသည့် သူ့စေတနာက သူလို လူငယ်တယောက် အယောက်တသိန်းနေလို့ တယောက်လောက်တောင် တွေ့ရပါ့မလားလို့ ကျွန်တော်သံသယ၀င်လျှင် ကျန်သည့်လူငယ်တွေကို အထင်မြင်သေးခြင်းမဟုတ်။

အခုတော့ စာဖတ်တာ ကျွန်တော် ချွေးစို့လာလေပြီ။ ခုန်ပေါက် မြူးတူးချင်လာပြီ။ လက်ကြီးနှစ်ဖက်ကို အားရပါးရလွှဲပြီး လမ်းလျှောက်ရသလို ကျွန်တော် သူ့စာအုပ်ကို ဆက်ဖတ်နေမိသည်။ သို့သော် လေရှူရတာတော့ သိပ်မကောင်း။ သွေး ကွဲနံ့တွေ ကျွန်တော်ရနေသည်။ လမ်းချော်သည့်အနံ့တွေ ကျွန်တော်ရနေသည်။ ဒီအနံ့ဆိုးတွေပျောက်စေဖို့ အားလုံး စိတ်တူ ကိုယ်တူ မဖြစ်ကြလျှင်တောင်မှ ဒီမိုကရေစီစစ်စစ်ကြီးရမှ ရန်ထပ်ဖြစ်စေချင်သည်။ အခုတော့ စာဖတ်ရတာ သိပ်တော့စိတ် မဖြောင့်။

ဖိုးထက်